هلمند: په نهر سراج کې ۱۸ عسکر وژل شوي او دوې پوستې طالبانو نیولي دي.

کابل ټکی کام (زمری۲۱مه، ۱۳۹۵ل) بصیراحمد پاڅون
طالبان وایي چې تیره شپه یې د دوه ساعته جګړې په ترڅ کې د ګریشک ولسوالۍ د نهرسراج الکوزو پوپلزو شاخو په سیمه کې دوې پوستې نیولي اتلس تنه عسکر یې وژلي چې د دولسو تنو عسکرو جسدونه یې د جګړې په ډګر کې پاتې دي.
طالبان وایي چې په نیول شویو پوستو کې یې زیات شمیر سپکې او درنې وسلې او پوځي مهمات هم ترلاسه کړي دي.
د هلمند د والي ویاند عمر ځواک نن سهار رسنیو سره په خبرو کې د نهر سراج د جګړې پخلی کړی او د زیات شمیر طالبانو د وژلو ادعا یې وکړه.
طالبانو پدې جګړه کې د دوو تنو طالبانو د وژل کیدو او دووتنو د ټپي کیدو خبر ورکړی.
په هلمند ولایت کې تیره شپه خپلواکو سرچینو خبر ورکړی و چې د ناوې ولسوالي هم طالبانو نیولي خو طالبانو پخپله څه نه و ویلي مګر طالبان وایي چې په ناوه ولسوالۍ کې اوس هم درنه جګړه روانه ده، د امریکایي او افغان پوځ چورلکو د ولسوالۍ شاوخوا سیمو کې پر ملکي خلکو ظالمانه بمباري کړي د ښځو او ماشومانو په ګډون یې ۱۸ تنه شهیدان او ۲۲ تنه ټپیان کړي دي.
په ګریشک ولسوالۍ کې د طالبانو دا پرمختګ به په ناوه نادعلي او ګرمسیر ولسوالیو کې بې اغیزې پاتې نشي.