اردوغان: امریکا مجبوره ده، چې د ترکیې او فتح الله ګولن ترمنځه یو انتخاب کړي
(کابل ټکی کام ۱۳۹۵ زمری ۲۱) زرغون خوږیاڼی
پرون د ترکیې په پلازمینه انقره کې د ولسمشرۍ د ماڼۍ په مخکې ځانګړي مراسم جوړ شوي وو، چې په کې زرګونو تنو برخه اخیستې وه، چې د اردوغان د دیموکرسۍ نوبت وروستۍ غونډې ته راټول شوي وو.
د ترکیې ولسمشر رجب طیب اردوغان تیره شپه ولسمشرۍ ماڼۍ په مخکې راټولو شوو په لسګونو زرو تنو ترکیانو ته وینا وکړه. ولسمشر اردوغان وویل چې د تیرو ۲۷ شپو راهیسې روان د ډیموکراسۍ نوبت پایته رسو.
په ترکیه کې د جولای د ۱۵ مې د کودتا د ناکامې هڅې نه وروسته پيل شوې د دیموکراسۍ نوبت تیره شپه د ترکیې په یو زیات شمیر ښارونو کې د سلګونو زرو تنو په ګډون د ځانګړو مراسمو سره پایته ورسید.
په تیرو ۲۷ شپو کې د ترکیې په ۸۱ ولایتونو کې په سلګونو زرو تنو د ډیموکراسۍ د نوبت او د ترکیې د ناکامې کودتا غندلو په خاطر شپې په میدانونو کې سبا کولې.
اردوغان خپلو خلکو ته په وینا کې وویل، چې د کلونو کلونو راهیسې د فتح الله ګولن ترهګریز سازمان د بې عدالتۍ، ریاکارۍ، ناحقو تهمتونو او بې قانونۍ سره مبارزه کوو؛ خو دې ترهګریز سازمان دا ځل د بې ګناه انسانانو په وینو لاسونه سره کړل او د وطن سره یې خیانت وکړ. اردوغان وویل چې ترک ملت هر څه بښلی شي؛ خو خیانت نه بښي.
اردوغان د امریکا په اړه وویل: « وخت وي او که ناوخته امریکا مجبوره ده، چې یو انتخاب وکړي. امریکا مجبوره ده چې د ترکیې او لوی ترهګر فتح الله ګولن ترمنځه یو انتخاب کړي».
اردوغان په خپله وینا کې د ناکامې کودتا ورځ د خپلواکې ورځ ونوموله: « په ترکیه کې انقره یواځنی ښار و، چې د چا لخوا اشغال شوی نه وو، د همدې امله يي د خپلواکۍ ورځ نه درلوده؛ خو نن ورځ انقرې هم د خپلواکۍ ورځ پیدا کړه. ددینه وروسته د جولای ۱۵ مه د انقرې د خپلواکۍ ورځ ده».
اردوغان وویل، اوس د ګولن ترهګریز سازمان د خیانت نوبت د پي کا کا ترهګرې ډلې ته تسلیموي او هغه بیا د داعش ترهګرې ډلې ته نوبت ورکوي.
ولسمشر اردوغان ټولو هغو ترکیانو نه، چې د کودتاچیانو پلان يي ناکامه کړ او د تیرو ۲۷ شپو راهیسې یې شپې په میدانونو کې سبا کړې د زړه له کومې مننه وکړه.
د غونډې په پای کې ولسمشر اردوغان وویل: ((الله تبارک و تعالی دې زمونږ د ملت او وطن حفاظت وکړي)).
