کندهار: طالبانو په شاولیکوټ کې د اردو جنګي چورلکه ویشتلې ده
(کابل ټکی کام ۱۳۹۵ تله ۱۱) زرغون خوږیاڼی
نن سهار د کندهار ولایت په شاولیکوټ ولسوالۍ کې د اردو جنګي چورلکه چې سیمې کې یې د ملي اردو عسکرو په ملاتړ بمبار کولو، نسکوره شوې ده.
په سیمه کې وسله والو طالبانو رسنیو ته ویلي دي، چې چورلکه د شاولیکوټ ولسوالۍ د سره سخر په سیمه کې د زیګویک په مټ وویشتل شوه او رانسکوره شوه.
طالبانو ویاند ذبیح الله مجاهد ویلي، چې په چورلکه کې سپاره ټول عسکر وژل شوي دي.
طالباب ویاند وايي، چې د اردو عسکر سیمې ته د ترینکوټ لارې د خلاصون لپاره راغلي وو، چې جنګي چورلکې هم ورسره ملګرې وې، دوی وايي چې د اردو عسکر د چورلکې غورځیدو ځای ته په شا ولاړل او وژل شوې عمله ترې لیږدوي.
تر اوسه دولتي سرچینو په دې اړه څه نه دي ویلي.
