هندي او پاکستاني پوځيانو يو پر بل ډزې کړي
(کابل ټکی کام ۱۳۹۵تله ۱۱) الماس خدرخېل
نښته د کشمير په کرښه پرته سيمه کې رامنځته شوې ده، د پاکستان پوځ د عامه اړيکو اداره وايي، چې د کشمير په بيمبر سيمه کې هندي پوځ د سپکو او درنو وسلو ډزې کړي دي، خو بل پلو د هند دولتي رسنيو ويلي، چې پاکستاني پوځيانو په جمو کې د اخنور پر سيمه بريد کړی دی.
دواړو طرفونو ادعا کړې چې ځوابي ډزې يې کړي، خو دا لا نه ده روښانه چې لومړی بريد چا کړی دی.
په نښته کې د اوښتو تلفاتو په اړه کره مالومات نه دي ورکړل شوي.
دا نښته داسې مهال ترسره کېږي، چې وړمه ورځ هم هندي چورلکو د کشمير لانجمنې سيمې د کنټرول په کرښه بمباري وکړه، چې پاکستاني چارواکو وويل بمباري د دوی په سرتېرو شوې او دوه پوځيان پکې وژل شوي دي.
د روانو حالاتو له امله د پولې دواړو غاړو ته مېشت خلک خوندي ځايونو ته لېږدول شوي دي.
له تېرو څو ورځو راهيسې د داړو هېوادونو ترمنځ پرته لانجمنه کشمېر سيمه کې هندي او پاکستاني پوځيان يو پر بل وسله وال بريدونه کوي.
