فاریاب کې محلي پولیسو(اربکیانو) ۲ کورونه سوځولي او د قرانکریم یې سپکاوی کړی
(کابل ټکی کام ۱۳۹۵ لیندۍ ۱۵) زرغون خوږیاڼی
تېره ورځ د فاریات ولایت په شیرین تګاب ولسوالۍ کې محلي پولیسو(اربکیانو) د عامه وګړو ۲ کورونه سوځولي او د قرانکریم سپکاوی یې کړی.
له شیرین تګاب ولسوالۍ څخه یوه تن کابل ټکی کام ته وویل، چې تیره ورځ ددغې ولسوالۍ اړوند د ګور اغلي او جرقلعه سیمو کې محلي پولیسو(اربکیانو) د ملکي وګړو په کورونو ناڅاپه یرغل وروړ او په زور زیاتي سره په کورونو ورننوتل، کله چې ځايي خلکو ممانعت وکړ نو یې عام وګړي له وهلو ډبولو وروسته وتړل.
د سرچینې په وینا، وروسته یې د عامو وګړو دوه کورونه وسوځول او په قصدي توګه یې د خلکو پر وړاندې قرانکریمونو ته هم اور ورته کړ.
د ځايي خلکو په وینا، اربکیانو د عامو خلکو له کورونو قیمتي توکي، پیسې او د میرمنو ګاڼې هم له ځانه سره وړي دي.
طالبانو د یاد خبر تصدیق کړی؛ خو دولتي چارواکو په دې اړه څه نه ویلي.
له کله نه چې په هیواد کې د امریکا په طرحه د محلي پولیسو(اربکیان) غیر دولتي وسله والې ډلې جوړې شوي نو یې د ولس په ځورولو اوچور تالا پیل کړی دی، اوونۍ وړاندې د ولسي جرګې غړیو هم ویلي وو چې محلي پولیسو د هیواد په عامه زورونو لاس پوری کړی او باید دغه خپلسري وسله وال په نظامي قطعو کې جذب شي او یا له منځه لرې شي.
