ترکيه: په دوه چاودنو کې ۳۰ تنه وژل شوي تر۱۵۰ ډېر ټپيان دي
(کابل ټکی کام ۱۳۹۵ليندۍ ۲۱) الماس خدرخېل
د ترکيې په استانبول ښار کې چاودنې ترسره شوي، چې لږ تر لږه پکې ۳۰ تنه وژل شوي او تر يو سلو پنځوس ډېر ټپيان دي.
ويل کېږي، چاودنې د نوموړي ښار بيشکتاش په سيمه کې د شنبې په ورځ د ويدافون ارينا فوټبال لوبغالي تر څنګ ترسره شوي دي.
د ترکيې د کورنيو چارو وزارت چارواکي وايي، چې له چاودېدونکو توکو ډک موټر په سيمه کې د پوليسو د وژلو په هدف چول شوی او دوهمه چاودنه د سرتيري بريد له امله رامنځته شوې ده.
امبولانسونه او پوليس د پېښې ځای ته رسېدلي خو عيني شاهدان وايي، له چاودنې وروسته يې د ډزو غږونه هم اوريدلي دي.
د چاودنې ځای ته نږدې ودانۍ زيانمنې شوي او تر لرې واټن پورې د نورو ودانيو شيشې هم ماتې شوي دي.
تر دې دمه کومې ډلې د يادو چاودنو مسؤليت نه دی منلی، خو د ترکيې پوليسو د چاودنو په تړاو د يکشنبې په شپه يعنې بېګا لس تنه شکمن کسان نيولي دي.
د ترکيې رسنيو ويلي، چې لومړۍ چاودنه د ترکيې بلواضد پوليسو موټر ته نږدې رامنځته شوې.
د ترکيې ولسمشر اردغان دا چاودنې يو ترهګريز عمل بللی او ويلي يې دي، چې دواړه چاودنو کې پوليس او عام خلک په نښه شوي دي.
