(کابل ټکی کام ۱۳۹۵ مرغومی ۱۰) زرغون خوږیاڼې
سوریه چې وګړي یې د اسدي رژیم او روسي الوتکو په بمباریو کې ټوټه ټوټه شول او ځینې یې په مات ګوډ حالت کې د مرستو هیلې لرلې د پردې تر شا د یو بلې سترې فاجعې ښکار شوي دي.
په یوه نوي راپور کې راغلي، چې د سوریې په جګړو کې وژل شوي او یا ټپیان شوي کسان د انسانانو د اعضاو داخلي او بهرنيو غلو لاسته ورغلي چې هغوی یې بیا اندامونه پرې کړي او د ابادې نړۍ روغتونونو ته یې وړي دي.
«سپوتنيک» ورځپاڼې په یوه راپور کې ويلي چې د انقلابیانو او د بشار الاسد د رژيم د جګړې تر څنګ په سوریه کې د پردې تر شا یوه بله خطرناکه جګړه روانه ده، چې ټپیان او مړي يې قربانيان دي او د بې وسلې مفاد پرستو وحشیانو له لورې په مخ وړل کېږي. دوی له جګړې وروسته په مړو او ټپیانو پسې ګرځي څو د دوی جسدونه وڅيري او ځيګر، ګردې، سترګې، زړه او د بدن نور غړي ترې وباسي.
راپور کې راغلي چې له جګړې وروسته د پېښې ځای ته یوه ډله له «امبولانسونو» سره د بېړنيو طبي مرستو په پلمه ورځي او د ټپیانو او مړو د بدن غړي غلا کوي.
راپور د ډاکتر عکروش له خولې ليکي، چې دغو کړنو کې یو شمېر سوريايي ډاکټران هم ښکېل دي او زیات قربانیان يې ماشومان دي.
علیا چې د یادې پېښې بل ښکار شوی تن دی وايي، «ناروغان په روغتونونو کې د علاج په پلمه بسترېږي او د عملیاتو پر مهال ورڅخه بشري اعضا ويستل کېږي».
نوموړی زیاتوي چې په سوریه کې اوس هر څه روا دي؛ له ښځو نيولې د بشري اعضاو تر تجارت پورې. د مړي د جسد قیمت ۲۵ زره ليرې دی او د ټپي قيمت ۱۵۰ زره ليرې دی.
شپېته کلن ابو محمد چې د یادې پېښې ښکار شوی وايي، چې د ډاکترانو يوې ډلې له ده څخه ګرده او د پښتورګي څه برخه ويستې ده.
نوموړی وايي، «کله چې چاودنه او یا بمبار وشي یوه وسله واله ډله له امبولانسو سره د پېښې ځای ته ځان رسوي او له قربانیانو سره د مرستې په پلمه د هغوی اعضا ور څخه غلا کوي».
ابو محمد وايي، «زموږ په کلي چې کله بمبار وشو، زه د راکټ په چره زخمي شوم. د پېښې ځای ته امبولانسونه راغلل. زما لور ته څو کسه رانږدې شول څو بېړنۍ مرسته راسره وکړي. زه په ځان نه پوهېدم، خو کله چې په خود شوم کتل مې چې يوه ګرده او د پختورګي څه برخه مې ويستل شوې ده».
د انساني اعضاو د غلا ښکار شوي کسان وايي، چې له نږدې څو میاشتو راهیسې دا ډول په سلګونو پيښې شوي دي.
