(کابل ټکی کام ۱۳۹۶ وږی ۳۱ فرید افغان)
د انګلستان مشهورې ورځپاڼې ګارډین د هغې څیړنې جزیات خپاره کړي چې د اروپایي ټولنې د بنسټیزو حقونو ادارې لخوا د ۲۰۱۵ او ۲۰۱۶ کلونو ترمنځ شوې.
څیړنه جوتوي چې په ټوله اروپا کې د مسلمانانو پر وړاندې زورزیاتی او دهغوی سره تعصب زیات شوی او مسلمانان په یو نه، یو ډول له ځورونو سره مخ دي.
پاده سروې کې ۳۰ سلنه مسلمانانو ویلي چې دوی ته د نورو ادیانو معتقدین سپکې سپورې وایي او له دوی سره سخت چلند کوي .
۲ سلنه نورو ویلي چې آن فزیکي چلند او تاوتریخوالی هم ورسره کیږي.
پوښتل شویو کسانو دا هم ویلي چې د کار موندنې، درملنې او په کرایه د کور نیولو پر وخت ورته په بده سترګه کتل کیږي او تعصب ورسره شوی دی.
له دې ور آخوا د ښځو سره هم تعصباتو خپل زور اخیستی د دوی شرعي حجاب ته په بده سترګه کتل کیږي ۴۰ سلنه اروپایې مسلمانې مېرمنې چې نقاب اغونځي، وایي چې د همدې نقاب له کبله څوک کار نه ورکوي او ترې غوښتل کیږي چې د غربي کلتور په څیر نقاب لرې او نیمه بربنډه جامه واغوندي.
څیړنه زیاتوي چې د مسلمانانو سره د مذهبي اسلامي لباس پر سره هم تعصباتو زور اخیستی .
د څیړندوی پلاوي په وینا چې ۴۰ سلنه نارینه د پولیسو لخوا درول کېږي او پوښتنې ګروېږنې ورنه کېږي.
پر همدې مهال یوازې ۱۲ سلنه ګډونوالو ویلي چې دوی د دې تعصب په اړه پولیسو ته حال ورکړی او پاته نورو بیا ویلي چې په پټه خوله دا هرڅه زغمي.
څیړونکي وایي چې له مسلمانو پرګنو سره د تعصباتو د زیاتیدو لامل له یوه لوري ځینو افراطي ډلو لکه داعش، بوکوحرام لخوا د جینایي پیښو زیاتوالی او له بل پلوه د یو شمیر اسلامي هیوادونو چې د غربیانو تر سیطرې لاندې دي پڅ دریځ په لویدیځو هیوادونو کې میشت مسلمانان له انزوا او بې اعتنایي سره مخ کړي دي.
