(کابل ټکی کام ۱۳۹۶ کب ۹ فرید افغان)
وروسته تر هغه چې د سعودي باچا سلمان بن عبد العزیز د خپل پوځ لوی درستیز او د دې هیواد دهوایي ځواکونو قوماندان له دندې ګوښه کړل او همدا راز یې په پوځ کې مختلف تغیرات راوستل، امریکا ویلي چې له دې هیواد سره د اتومي هوکړې پر سر خبرو ته چمتو ده.
امریکایي چارواکو رسنیو ته ویلي چې د دې هیواد دانرژۍ وزیر«ریک پری» لندن ته رسیدلی او هلته به له سعودي چارواکو سره په دې تړاو خبرې وکړي.
دوو لوړ پوړو امریکایي چارواکو چې نوم یې نه دی یاد شوی، واشنګټن پوسټ ته ویلي چې دا تړون به له سعودي څخه د میلیاردونو ډالرو لمن راونیسي او په بدل کې به یې امریکا په دې هیواد کې د یورانیمو د محدوده غني کولو په موخه یوه اټومي بټۍ پرانیزي.
سعودي چارواکو له امریکا غوښتي چې د محدودو یورانیمو د غني کولو شرط هغه مهال مني چې واشنګټن د ایران د یورانیمو د غني کولو پروسه هم له مخې وتړي.
امریکایي وزیر به له سعودي سره د « 123موافقتنامه» هم لاسلیک کړي چې له مخې به یې امریکایي شرکتونه کولی شي چې له سعودي سره په اتومي برخه کې همکاري وکړي.
او همداراز اتومي سرګلولې دې هیواد ته ولیږدوي، په دې شرط چې یاد هیواد به پلوتونیم نه جوړوي.
په دې جوړجاړي کې د یورانیمو د غني کولو پر محدودیت او غیر محدویت بحث کیږي چې سعودي غواړي د امریکا په مرسته اتومي بم ولري خو امریکا دا اجازه نه ورکوي او یواځې پر محدودو یورانیم غني کولو ټینګار کړي.
سعودي هڅه کوي د اسرایلو په همکارۍ امریکا دې کار ته وهڅوي ترڅو د خپلو رقیبو هیوادونو (قطر لیران، لبنان، فلسطین او…) لپاره ښه ځواکمن اټومي هیواد جوړ شي.
د منځني ختیځ یوشمیر کارپوهان په دې آند دي چې امریکا به له دې هیواد سره اټومي توافق وکړي خو یورانیم به تر هغې کچې غنی نه کړي چې د بم جوړولو توان ولري په همدې توګه به یواځې ترې میلیاردونه ډالر جذب کړي او وروسته به یې پر تش میدان پریږدي.
