(کابل ټکی کام ۱۳۹۶ وری ۵ فرید افغان)
د میدان وردګ ولایت سیمیز خلک وایي چې افغان امنیتي ځواکونو یې په کورونو کې د طالبانو سره د جګړې په موخه مستحکمې پوستې جوړې کړې.
دوی وایي امنیتي ځواکونو له کورونه څخه ایستلي او له کوم بدیل ورکولو پرته یې په کې پوځي مرکزونه میشت کړي.
د سيمې يو قومي مشر حاجي صالح ګل افغان اسلامي اژانس ته ویلي، امنيتي سرتيرو د خلکو په کورنو کې پوستې جوړې کړې، خلک يې کډه شول او جګړه د کليو منځ ته ورغله
که څه هم د خلکو له هټیو او کاروباري ځایونو سره له پخوا پوستې وجود لري خو د دې ولایت خلک د خپلو کورونو په له لاسه ورکولو غصه دي چې په خبره یې دوی مجبور دي ترڅو خپلې خونې پریږدي
ځایي خلک وایي؛ د دې ولایت په سیدآباد ولسوالۍ او سالارو سیمه کې تر ۲۰ ډیرو کورونو کې پوستې جوړې شوې او هستوګن وګړي یې کډوالۍ ته اړ ایستل شوي.
د میدان وردګ د والي ویاند عبدالرحمان منګل د سیمیزو خلکو پر میشت ځایونو کې د پوستو وجود مني خو زیاتوي چې په یادو کورونو کې خلک نه وو هغه ادعا چې خلک یې ردوي.
منګل وایي ؛ ځکه مو د خلکو په کورونو کې پوستې واچولې چې له همدې سیمو پر افغان ځواکونو حملې کیدلې.
دا یواځې وردګ نه دي چې له دې ستونزې کړیږي بلکه د هیواد په کچه په ډیرو ولایاتو کې افغان ځواکونه د مکاتبو او د خلکو له میشت ځایونو څخه د سنګر په توګه استفاده کوي چې ښه بیلګه یې د هلمند ولایت دی چې څو ورځې وړاندې یې د پوهنې ریاست خبر ورکړی و چې د دې ولایت په ۲۰ ښوونځيو کې د امنیتي ځواکونو پوستې پرتې دي او د اړوندو سیمو شاګردان له کلونو راهیسې له زدکړو محروم دي.
