(کابل ټکی کام، ۱۳۹۷، وری ۵) د افغانستان د مشرانو جرګه وايي، سيد اسحق ګيلاني بايد د وروستيو څرګندونو په اړه مجازات او محکمې ته وړاندې شي.
د مشرانو جرګې رئيس فضل هادي مسلميار د مشرانو جرګې په ننۍ غونډه کې وويل، د ګيلاني وروستۍ څرګندونې د اساسي قانون او د ملي ارزښتونو پر ضد دي، امنيتي ادارې او ولسمشر بايد دغه موضوع جدي ونيسي او نوموړی مجازات او محکمه کړي.
د ملي پيوستون د ګوند مشر سيد اسحق ګيلاني څو ورځې مخکې په اسلام اباد کې د افغانستان په تړاو په يوې جوړې شوې غونډې کې وويل، چې افغان حکومت هند ته دا زمينه برابره کړې چې خاوره يې د پاکستان پرضد وکارول شي.
د ولسي جرګې يو شمير نورو غړو هم د ګيلاني د څرګندونو پر خلاف سخت غبرګون ښودلی، د هغه خبرې يې د ملي ګټو خلاف او نوموړی يې د پرديو غلام بللی، غوښتنه يې کړې چې نوموړی بايد د قانون منګولو ته وسپارل شي.
تر دې مخکې، پاکستاني چارواکو ويلي و چې هند د افغانستان خاوره د پاکستان پرضد کاروي خو افغان چارواکي د پاکستان دغه ادعاوې رد کړي دي.
