(کابل ټکی کام ۱۳۹۷ غویی ۳۰)
وروسته تر هغه چې د امریکایي ځواکونو عمومي قوماندان جنرال نیکولسن او افغان چارواکو په فراه کې د طالبانو وروستي خوځښتونه د ایران په لمسون یاد کړل او هغه یې د اوبو پر سر له دې هیواد سره د جنجال جرړه وبلله، په کابل کې د ایران سفیرمحمد رضا بهرامي یې پر وړاندې توند غبرګون ښوودلی.
نوموړي ویلي؛ افغان حکومت زمونږ او طالبانو تر منځ له شته تماس نه ښه خبر دی، او پوهیږي چې موږ په کومه کچه له دې ډلې سره اړیکې لرو.
نوموړي آریانا نیوز ته ویلي؛ موږ تل هڅه کړې چې طالبان له افغان حکومت سره مذاکراتو ته وهڅوو او دا هرڅه مو د ملي یووالي له حکومت سره وخت په وخت شریک کړي دي.
هغه زیاتوي؛ افغان حکومت په خپل هیواد کې زمونږ ملګري او دښمنان ښه پیژني، خو داچې عامه اذهان تخریب کړي او د نړیوالو پام ځانته راواړوي، دا ډول بیځایه اتهامات لګوي.
له نوموړي وپوښتل شول چې په فاطمیون لښکر کې د شته افغانانو په تړاو څه نظر لري ؟ هغه وویل؛ افغان هزارګان موږ نه دي هڅولي چې سوریې ته لاړ شي،بلکې په خپل شوق هلته تللي دي.
رضایي زیاته کړه؛ مونږ هیله لرو چې افغانستان قوي پوځ او هوډمنه حکومتداری ولري، تر څو د بهرنیانو له حضور څخه خلاص شي.
په ټولنیزو رسنیو کې هم د افغان چارواکو دې ادعا غبرګونونه راپارولي او فعالانو ویلي چې نه یواځې په فراه بلکې په ګڼو بې سرحده ولایاتو کې تر دې سختې نښتې روانې دي چې غزني یې یوه بیلګه ده .
د دوی په خبره؛ افغان حکومت غواړي د جګړو په ډګرونو کې خپله ماتې په دې ډول بې بنسټه ادعاګانو سره وپوښي .
طالبانو هم د دفاع وزیر هغه خبره رد کړې چې تیره ورځ یې په فراه کې په یوه غونډه کې وویل چې د فراه جګړه د اوبو پرسروه.
طالبانو د فراه په غونډه کې یوه تصویر ته اشاره کړی او ویلي دي چې جګړه د دغه بیرغ او دغه شخص له امله ده.
په تصویر کې د امریکایي جنرال نیکولسن او پرمیز ایښي امریکایي بیرغ څخه سرې کرښې را تاوشوی دي.
باید وویل شي چې تر ډیره باور دادی چې ایران د ځینو حکومتي چارواکو او سیاسي کړیو سره ژورې اړیکې چې هغوی په لویه کچه د خپلو ګټو د تامین په موخه تمویل او تجهیزوي.
