(کابل ټکی کام ۱۳۹۷ غویی ۳۰)
د کندهار ولایت امنیتي چارواکي شکایت کوي چې پولیسو ته یې له تیرو دریو میاشتو را په دې خوا معاشونه ندي رسیدلي.
دوی زیاتوي؛ د روژې را رسیدل او د عسکرو اقتصادي مشکلاتو ګڼ شمیر ځواکونه اړ کړي تر څو د امنیتي ځواکونو لیکې پریږدي او شخصي کاروبارونو ته مخه کړي.
دوی زیاتوي؛ د پولیسو معاشونه د ارګ او جنرال رازق ترمینځ د وروستیو جنجالونو له امله ځنډول شوي تر څو له دې لارې پر هغه فشار راوړي چې دنده پریږدي.
جنرال رازق څو میاشتې وړاندې د بلخ د پخواني والي عطانور په لمسون پرحکومت ژغ کړی و، چې هیڅ قدرت یې له دندې نه شي پرزولی او پر حکومت یې سختې نیوکې هم کړې وې.
بلخوا بیا د کورنیو چارو وزارت پولیسو ته د تنخوا د نه ورکړې خبر مني،خو زیاتوي چې هغو پولیسو تنخواوې نه دي تر لاسه کړې چې د نظم عامې اړوند دي، ځکه د دوی په خبره؛ د نظم عامې پولیس په دې وروستیو کې د ملي دفاع وزارت کې مدغم شوي دي.
د ولسي جرګې غړي بیا د دې ستونزې په تائید سره وایي چې نه یواځې کندهار، بلکې د هیواد ډیری ولایاتو کې پولیسو ته معاشونه ندي رسیدلي او له جدي ستونزو سره لاس او ګریوان دي.
دا په داسې حال کې ده چې د مالیې وزارت وروستۍ څیړنې ښیي چې د ملي دفاع وزارت په تیرو څلورو میاشتو کې یوه سلنه بودیجه هم نه ده مصرف کړې او د بودیجې د لګولو په برخه کې تر ټولو وزارتونو وروسته پاتې وزارت بلل کیږي.
