د دوستم پلويان: که د دوستم د راتګ زمينه برابره نه شي پاڅون به وکړو
(کابل ټکی کام، ۱۳۹۷، غبرګولی ۱۰) نن په فارياب ولايت کې د دوستم سلګونه پلويانو د يوې غونډې په ترڅ کې غوښتنه وکړه چې د ولسمشر تبعيد شوی لومړی مرستيال جنرال دوستم دې له کوم شرط پرته بيرته هېواد ته راوغوښتل شي.
د دوستم پلويانو ګواښ وکړ که حکومت د هغه پرضد له ناوړه سياست څخه ډډه ونه کړي او د هغه د راتګ لاره جوړه نه کړي نو دوی به هم د حکومت پرضد وسلې راواخلي او پاڅون به وکړي.
غونډه والو د دغه ولايت د امنيتي وضعيت په اړه اندېښنې څرګندې کړې او ويې ويل چې حکومت د امنيت په ټینګولو کې پاتې راغلی دی.
له بله پلوه د فارياب د ملي امنیت په خپله رسمي فسبوک پاڼه ليکلي: چې ياده غونډه يواځې په جنبش ګوند پورې اړه لري زياتوي چې دغې غونډې ته د دوستم پلويانو په زور سره د ليسو زده کوونکي او محصلين ور وستي و.
د يادونې ده، چې نږدې يوه اوونۍ مخکې راپورونه ورکول شول چې ولسمشر غني ترکيې ته د خپل تګ پر مهال له دوستم سره تليفوني خبرې کړي او هغه يې بيرته هېواد ته راغوښتی دی.
د دوستم او ايشچي تر منځ د شخړې له رامنځته کېدو څو مياشتې وروسته جنرال دوستم د ولسمشر غني په غوښتنه له هېواده تبعيد کړای شو چې اوس هم په هغه هېواد کې د جلا وطنۍ ژوند کوي.
