(کابل ټکی کام، ۱۳۹۷، چنګاښ ۲۳) د افغانستان د مشرانو جرګې غړ او د دغه جرګې د دفاعي کمېسيون رئيس محمد هاشم الکوزی وايي، افغانستان ته د بلک واټر کمپنۍ د ځواکونو او د نورو بهرنيو ځواکونو راتګ د هېواد په ګټه نه بلکې په زيان دی.
د الکوزي په خبره، افغانستان ته د بلک واټر کمپنۍ او د اضافي بهرنيو ځواکونو راتګ سره به د سولې په اړه د هېوادوالو لږې هيلې هم له خاورو سره خاورې کړي.
نوموړی وايي: “د بلک واټر کمپنۍ يا د نورو بهرنيو ځواکونو راتګ هيڅکله د هېواد په خير نه دی، په ټرمپ او ناټو مشرانو غږ کوم چې نوره د افغانستان په اړه د جګړې پاليسي مه غوره کوئ، بلکې د جګړې پر ځای د سولې هلې ځلې وکړۍ، هېواد ته د راتګ په اړه د بلک واټر وړانديز د افغانستان په ګټه نه په زيان دی”.
د بروکسل له ناستې وروسته د بلک واټر په نوم امريکايي پوځي کمپنۍ مشر ايريک پرنس يوځل بيا وړانديز کړی چې امريکا دې د افغانستان جګړه دغه کمپنۍ ته وسپاري ترڅو يې لګښت کم شي.
بلک واټر چې په افغانستان او عراق کې ښه مخینه نه لري او د عامو خلکو په زورونه، شکنجو، قتلونو او خپلسريو زندانونو تورنه کمپنۍ ده، څه موده مخکې داسې راپورونه ورکول شول چې د امريکا ولسمشر ټرمپ ته يې يوه طرحه لېږلې او له هغه غوښتنه شوې وه چې د افغانستان کانونه دې بلک واټر ته وسپارل شي چې دوی يې استخراج کړي.
د بلک واټر امریکايي کمپنۍ د پخواني ولسمشر حامدکرزي د دورې پر مهال په افغانستان کې پوځي ماموريت کړی او په شخصي زندانونو کې يې ډیری افغانان شکنجه کړي، ترور کړي او وژلي دي.
