د روان زیږدیز کال د تیرې فبروري د میاشتې په ۲۸مه اشرف غني طالب مشرانو ته وړاندیز وکړ چې سوله ورسره وکړي او له هغې وروسته يې د جون د میاشتې په ۷مه د کمکي اختر په را رسیدو د اوربند غوښتنه ترې وکړه، طالبانو د کمکي اختر په ورځو کې درې ورځې اوربند اعلان کړ، چې په ټول هېواد کې يې هرکلی وشو، خو د سولې په اړه چې تر اوسه پورې امریکا، اشرف غني او عبدالله وړاندیزونه کوي، طالبان يې ردوي؛ ځکه طالبانو چې له لومړي سره د سولې په اړه له هېواده د بهرنیو پوځونو له وتلو وروسته د مزاکراتو کولو دریځ نیولی، تر اوسه په خپل دریځ ولاړ دي.
اجرائیه رئیس (په حکومت کې د اشرف غني شریکباڼی) عبدالله په نیویارک کې ویلي چې د افغانانو په مالکیت دې طالبان سوله وکړي.
د ملګرو ملتونو په ۷۳مه غونډه کې چې په نیویارک کې جوړه شوې وه او عبدالله پکې طالب مشرانو ته د سولې د مزاکراتو وړاندیز وکړ، څه نوې خبره نه ده، بلکې امریکایي چارواکو په وار وار طالبانو ته د سولې لپاره د مزاکراتو وړاندیزونه کړي دي، خو طالبان يې ځکه نه مني چې دا وړاندیز د سولې نه، بلکې د سولې په نوم دام دی چې امریکا په افغانستان کې د بایللې جګړې وروسته په پلان کې نیولی دی.
عبدالله په نیویارکې غونډې ته وویل چې اشرف غني په وار وار بې د کوم قید او شرطه د بین الافغاني غونډې د جوړولو طرحه وړاندې کړې ده، خو طالبانو ورته مثبت ځواب نه دی ویلی، عبدالله به په خپل فکر د اشرف غني د سولې لپاره د مزاکراتو طرحه اړینه بولي، خو اشرف غني به هغه مهال د بین الافغاني مزاکراتو طرحه وړاندې کولای چې روانه جګړه بین الافغانی جګړه وای او بهرنیو په هيواد کې هیڅ ډول حضور نه درلودای.
په افغانستان کې روا نه جګړه د طالبانو او امریکایانو جګړه ده، اشرف غني خپله اعتراف کړی دی چې د امریکایي پوځونو له موجودیت پرته یوه اونۍ هم حکومت نه شي کولای، بیا څرنګه د بین الافغاني مزاکراتو طرحه وړاندي کوي؟
د ملګرو ملتونو په ۷۳مه غونډه کې د عبدالله دا خبره چې څوک له جګړې لاس اخلي، امتیاز به ورته ورکړي، ډيره بې ځايه ځکه ده چې اشرف غني او عبدالله دواړه له خپلو کورونو د وتلو واک نه لري، طالبانو ته به څه امتیاز ورکړي؟
طالبان په افغانستان کې د امتیازاتو لپاره جګړه نه کوي، که يې امتیازات غوښتلای، په وار وار ورته د امریکا لخوا په حکومت کې په لوړو پوستونو او امتیازاتو د برخې اخستنې وړاندیز شوی دی. دا تاریخ ثابته کړې ده چې سپیڅلی هدف په امتیازاتو نه، بلکې په قربانیو تر لاسه کیږی او طالبان به په خپلو قربانیو ټول بهرني پوځونه له افغانستانه تیښتې ته اړ باسي، ځکه خو یې د همدې سپڅلي هدف لپاره کفنونه پر سرونو تړلي دي.
طالبان د سولې او امن لپاره د بهرنیانو په مقابل کې په جګړه اخته دي، سوله او امن د طالبانو اصلي هدف دی، خو دا سوله هغه وخت راتلای شي چې بهرنیان له افغانستانه ووځي، کله چې جګړه بین الافغاني شوه، مزاکرات به هم بین الافغاني شي، اوس چې د سولې په نوم امریکا، اشرف غني او عبدالله کومې چغې وهي، دا سوله نه، بلکې د سولې په نوم یو دام دی او طالبان هیڅ وخت ځان په دام کې نه راګیروي.
