ليکنه: خاکسار
د وخت سيکولره! د هېواد اتلان څنګه ارزوې؟ اتلولي څه ته وايې؟ څوک د هېواد اتلان بولې؟ د يرغل مواد، يرغلګر، ظالمان، جابران، ښکېلاک ګر او بلواګر په کوم نوم يادوې؟
د وخت سيکولره!
يرغل پېژنې؟ يرغل څه ته وايې؟ ايا هېواد ته دې د امريکايانو راتګ يرغل نه دی؟ دا چې هېواد دې امريکا اداره کوي، ملکيان دې په بې رحمۍ په شهادت رسوي، نو د امريکا شتون دلته يرغل نه بولې؟ ايا اوس په افغانستان کې د امریکايانو شتون ته څه اړتيا شته؟
د وخت سيکولره!
دا چې په ملک کې دې امريکايان ګرځي، واک دې د همغوی په لاس کې دی، اقتدار او واکمن دې دوی درته ټاکي، د هېواد د ازادۍ اتلان دې په مختلفو تهمتونو درته رنګوي، د ټولنې پست او ذليل او د امريکايي ګټو لپاره جنګېدونکي خلک درته اتلان معرفي کوي، خو ته بيا هم د هېواد پرمختګ غواړې؟
د هېواد پرمختګ په څه شي کې دی؟ په دې پوهېږې، چې په هېواد کې مو پر ولسي وګړو بې درېغه، ناترسه او وحشيانه بمبارونه کوم ډول پرمختګ دی؟ دا ټولې ناخوالې څه ډول توجيه کوې؟
د وخت سيکولره!
منم چې ته اتل هغه څوک بولې کوم چې د غرب په غلامۍ کې ښه نوم لري، د امريکايانو هر امر په سر سترګو مني، له خپلو ملي او شخصي ګټو ورته د امريکايانو ګټې معتبرې او خوښې وي، د غرب په امر خپلو مقدساتو ته توهين کوي، د وطن ساتنې تر شعار لاندې پر عام ولس بې درېغه ظلمونه کوي، خو متل دی چې لمر په دوو ګوتو نه پټېږي، تر څو به همدغو نجسو ته اتلان وايې، تر کومه به د ازادۍ ريښتيني اتلان نورو ته منسوبوې او خپل وياړمن تاریخ به د نورو لپاره داغې! لږ په خپل ګرېوان کې سر ښکته کړه او وګوره چې تر کومه حده په غلامۍ کې غرق او تباه يې؟
د وخت سيکولره!
هغه څوک چې ته ورته اتلان وايې، په اړه يې تاریخ وګوره! چې ملت مو دغه رنګ اشخاص او وګړي په کوم نوم نومول؟ او په کومه سترګه به يې ورته کتل! ستا ريښتيني اتلان څوک دي؟ او ريښتينې اتلولي څه ته وايي؟ ستا ملت له نورو ملتونو توپير لري، ستا په ملت کې ازادۍ ته په لوړ معيار کتل کېږي، ستا ملت شعار لري چې مال مې دې له سره ځار وي او سر مې دې له ناموسه ځار وي، خو ته؛ نه پوهېږم! چې ولې دې د خپل ولس پر وړاندې خوله چوله کړې او اپلتې وايې؟ ولې دې خپل ولسي قوت او تحريک نورو ته منسوبوې؟
ځواب يې دا دی چې ته اصلاً ازادي بيخي نه پېژنې، که پېژنې يې هم نو برعکس غلامۍ ته ازادي وايې، د غرب لپاره جنګېدلو ته مبارزه او مجادله وايې، غربي فکر ته مسلم او مخ پر ودې فکر وايې، غربي سيکولرېزم درته د ژوندانه لوړ معيار ښکاري، د غرب د ګټو لپاره جنګېدونکي درته اتلان ښکاري او د ازادۍ ريښتيني اتلان بيا درته د نورو غلامان ښکاري.
د وخت سيکولره!
تاریخ وګوره! ستا په څېر خلک اکثره وخت د يرغلګرو تر تېښتې وروسته خپل ملت ته خړې سترګې ولاړ وي او له ولس څخه د تېرو بدو کړنو، فکر او سوچ معافي غواړي، ستا په څېر خلکو ته هېڅکله هم تاريخ شاباسی نه ورکوي، بلکې بد يې يادوي او وايي چې دا ډول خلک د ملت تر ټولو بد او ټيټ خلک وي، ځکه څوک چې د خپلې ټولنې د ازادۍ او غلامۍ تر منځ توپير ونه کړای شي نو تاریخ يې هم د نوم د ساتلو لپاره ځای نه لري.
د وخت سيکولره!
په اخلاص درته وايم! چې اوس هم لا وخت شته، چې تېر اعمال پرې جبران کړې، د هېواد حقيقي اتلانو ته اتلان او غلامانو ته غلامان ووايه! او هغه چاته تر ټولو زيات قدردان واوسه! چا چې د يوه مېلمه د عزت او درناوي لپاره خپل ټول حکومت او نظام نسکور کړ، مګر د خپل لارښود(حضرت محمد صلی الله عليه وسلم) د تقليد او پيروۍ لپاره يې يو مېلمه کفري ځواکونو ته تسليم نه کړو، سيکولره!که چېرته دغسې د ازادۍ ريښتي اتلان بل هېواد او بلې ټولنې درلودلای نو په الله ج قسم! چې په خپلو زړونو کې به يې ورته ځای ورکړی وای، خپل لېمه به يې ورته فرش کړي وای او په ستاينه کې به يې د بلبلانو په څېر نعرې او سورې وهلې وای، خو افسوس ستا پر بدمرغه حال!! چې لا هم د غربي تقليد وچه او ړنده پيروي کوې، لا هم د خپل ولس په کلتور، دودونو او عنعناتو پورې ملنډې وهې او د خپلې ازادۍ اتلان پرديو ته منسوبوې.
د وخت سيکولره!
له خپل ناولي فکره مه متأثر کېږه! ځکه چې دغه فکر به تا د بريا پر ځای د هلاکت کندې ته غورځوي، دغه فکر به تا له خپل ولس څخه جلا کوي، دغه فکر ستا او د ولس تر منځ واټنونه اضافه کوي، دغه ناولی او خوسا فکر به تا د شيطان لاروی جوړوي.
خو مخکې له دې چې د ولس له کينې او کرکې سره مخ شې! ځان اصلاح کړه!
د هېواد ساتنې شعار په حقيقي معنا وپېژنه! له مجازونو راووځه! او معنوياتو ته راشه! تر څو د خپل ولس دردونه حس کړې او د ريښتيني ټپ او علاج په اړه يې فکر او سوچ وکړې.
