(کابل ټکی کام، ۱۳۹۸، غویی ۵)
د ملګرو ملتونو يوناما تيره ورځ د ملکي تلفاتو اړوند په خپل درې مياشتني راپور کې ويلي، په ملکي تلفاتو کې درويشت سلنه کموالی راغلی زياتوي د وسله والو ډلو په پرتله تر ټولو زياته مرګ ژوبله د دولتي او بهرنيو ځواکونو په بمباريو او عملياتو کې رامنځته شوې ده.
راپور کې راغلي، څلورديرش سلنه ملکي تلفات دولتي او نړيوالو ځواکونو اړولي، نهه ديرش سلنه طالبانو او دولس سلنه داعش او درې سلنه ناڅرګندو وسله والو.
طالبانو د یوناما دغه راپور ته غبرګون ښودلی وايي، په راپور کې اسلامي امارت ته منسوبه شوې شميره حقيقت نه لري.
د طالبانو له خوا په خپره کړې اعلاميه کې راغلي، لکه څومره تلفات چې بهرنيانو اړولي په هغه اندازه تلفات ورته نه دي منسوب شوي ” په دې اړه سیاسي او سلیقوي چلند شوی”.
طالبان وايي، دوی هڅه کړې چې له خپل لوري ملکي تلفات کم کړي او په دغه چاره کې بريالي شوي هم دي.
طالبانو د ګډو ځواکونو شپنيو، ځمکنيو عملیاتو او هوايي بريدونو ته اشاره کړې چې هره شپه او ورځ پکې لسګونه هيوادوال وژل کيږي، کورونه او عامه ځايونه يې نړول کيږي زياتوي: “اسلامي امارت له یوناما څخه غواړي چې د امریکايي اشغالګرو د روزمره جنایاتو په اړه لا هم بې پري قضاوت وکړي”.
طالبانو په یوناما او نورو بشرپالو ادارو غږ کړی چې د ملکي خلکو ژوند ته لازم اهميمت ورکړي او په دې اړه سياسي چلند ونه کړي.
دغه راز طالبانو د ورځې خبره تر عنوان لاندې چې د دوی رسمي نظر څرګندوني او د يوناما راپور په اړه خبره شوې زياتوي ملکي خلکو ته تر ټولو زياته مرګ ژوبله او مالي زيانونه د ګډو ځواکونو له خوا رامنځته کيږي خو یوناما یوازې د دغه وحشت ورځيني ارقام یاداشت کړي.
په مطلب کې د ملکي مرګ ژوبلې ارقام جمعه کول او بيا خپرول ساده او اسانه کار بلل شوی زياتوي د ملګرو ملتونو لومړنی شعار د بشريت اساسي حقوقو ساتنه او په جګړو کې د ملکيانو د مرګ ژوبلې مخنیوی دی :” د بشري حقوقو تحفظ او د ملکي وګړو د مرګ ژوبلو مخنیوی یوازې د ارقامو په اعلان او د اعلامیو په صادرولو باندې نه کیږي”.
