مجاهد: افغان حکومت د پروژو د افتتاح په څیر نور خبرونه هم مکرر نشروي
کابل ټکی کام ( یکشنبه، ۲۲غوایي، ۱۳۹۸)
نن په ځینو رسنیو کې خبر خپور شوی وو چې د طالبانو له لوري د جوزجان ولایت د فیض اباد ولسوالۍ لپاره نومول شوی ولسوال وژل شوی دی.
رسنیو دا خبر د ملي امنیت ریاست د ورکړل شوي راپور په اساس نشر کړی دی.
ملي امنیت ویلي چې د فیض اباد لپاره د طالبانو نومول شوی ولسوال ملا عبیدالله د ځانګړو ځواکونو په عملیاتو کې وژل شوی.
د طالبانو ویاند ذبیح الله مجاهد په خپل ټویټر د “دروغو مزل” تر عنوان لاندې یو لنډ ټویټ کړی دی.
مجاهد ویلي چې افغان حکومت تنها د پروژو افتتاح په مکرر ډول نه کوي بلکې خبرونه هم په مکرر ډول نشروي.
طالب ویاند وایي: “د کابل ادارې مسئولین د خلکو د تیر ایستلو لپاره تنها مکررې پروژې نه افتتاح کوي، بلکې مکرر خبرونه هم په رسنیو تیروي او اعلانوي.
لاندې خبر د روان ۱۳۹۸ کال د ثور د میاشتې په ۴ نيټه یوځل نشر شوی، خو نن ۱۸ ورځې بعد يې د پروپاګند لپاره بیا په ټولو رسنیو مکرراً نشر کړ”
مجاهد په خپل ټویټر یوشمېر انځورونه هم خپاره کړي، چې دا راپور له رسمي سرچینو څخه په مکرر ډول نشرشوی.
