کابل ټکی کام( شنبه، ۱چنګاش، ۱۳۹۸)
طالبان وایي چې له داعش فتنه ګرې ډلې سره د “اشغالګرو او کابل رژیم” مرستې کول نوې او له خلکو پټه خبره نه ده، بلکې هر وخت امریکایي او کورني ځواکونه د داعشیانو د ژغورنې عملیات ترسره کوي.
طالبانو په خپله رسمي ویب پاڼه الاماره باندې د “ورځې خبره” تر عنوان لاندې په خپاره کړي مطلب کې ویلي: “یرغلګر او کابل اداره افغانستان کې د داعش دژغورنې عملیات کوي، وسلې او مهمات ورته تهیه کوي، د داعش د قوي ښودلو لپاره تبلیغات کوي. څو ورځې وړاندې د امریکا دمرکزي قوماندانۍ قوماندان جنرال فرنک مکنزي وویل چې افغانستان کې داعش قوي شوی او کولای شي له افغانستانه پر امریکا بریدونه وکړي!! همدا راز دې ته ورته څرګندونې ډيری امریکایي چارواکو کړې او د داعش خیالي قوت د لوی ښودلو په موخه یې ډير کمپاین کړی دی.”
طالبانو په دې مطلب کې ادعا کړې چې د دوی ځواکونو څو ځله د امریکایانو لخوا داعش ته د رالیږلو وسلو ډک موټر نیولي او همدا رنګه تسلیم شویو داعشیانو اعترافونه کړي چې وسلي ورته امریکایان او د کابل ادارې لخوا رالیږل کیږي.
په دې مطلب کې د داعشیانو سره د امریکایانو د مرستې د ادعا د ثبوت لپاره یو پراګراپ په دې ډول لیکل شوی: “له داعش سره داشغالګرو او کابل رژیم مرستې نوې او پټه خبره نه ده،عامو خکو له مختلفو رسنیو سره خبرو کې ویلي: کله چې دطالبانو او داعش ترمنځ جګړه وي، بهرني او حکومتي ځواکونه دطالبانو سنګرونه بمباروي او د داعش د برلاسي لپاره په همدې وخت کې پر طالبانو بریدونه کوي.”
طالبان دا مطلب په داسې وخت کې خپروي چې وړمه شپه په کونړ کې د داعش ډلې مشران هغه مهال امریکایي او کورنیو ځواکونو د الوتکو پرمټ نامالوم لوري ته انتقال کړل چې د طالبانو لخوا محاصره سوي وو.
په رسنیو کې خپاره شوي شواهد او اسناد دا په ډاګه کوي چې داعش ډله په افغانستان کې د امریکا او د افغانستان حکومت یوه ګډ پروژه ده او له دې لارې غواړي چې امریکایان خپلو اهدافو ته ځانونه ورسوي.
د یادونې وړ ده چې په کونړ کې له تیرو څو ورځو راهیسي په داعشي ملیشو د طالبانو لخوا سخت عملیات روان دي او ویل کیږي چې طالبانو ډیرې سیمې ترې نیولي هم دي.
