کابل ټکی کام( چهارشنبه، ۱۹ چنګاش، ۱۳۹۸)
د ایران هغې وروستۍ پرېکړې ته چې دوی پکې د یورانیمو د زیات تولید خبر ورکړی، ځینو هیوداونو توند غبرګون ښودلی دی.
د اروپایي ټولنې په ګډون جرمني، برېتانیا او فرانسې په یوه ګډه اعلامیه کې د ایران لخوا د اتومي تړون د ماتولو په اړه خواشیني ښودلې او له دې هیواده یې غوښتي چې له خپلې دې پرېکړې دې بیرته په شا شي.
دوی همدا رنګه د ایران او امریکا په کړکېچ کې له ټولو خواوو غوښتي چې د روان تاوتریخوالي د کمولو لپاره باید مسؤلانه چلند او اقدام وکړي.
ایران بیا وایي، ځکه یې تړون مات کړی چې له دې تړونه د امریکا تر وتلو وروسته دې هیواد په تهران بندیزونه ولګول او لا هم ادامه لري خو په وینا یې چې اروپایي هیوادونو د دوی ملاتړ ونه کړ.
د فرانسې د بهرنیو چارو وزیر “ژان یو لو دریان” ویلي چې د ایران لخوا د یورانیمو د بډایولو فیصله د بدې پرېکړې په وړاندې بد غبرګون وو.
د دریان له “بدې پرېکړې” هدف د ۲۰۱۵کال اتومي تړون نه د امریکا وتل دي.
