کابل ټکی کام( جمعه، ۲۸ چنګاش، ۱۳۹۸)
طالبانو په خپله رسمي الاماره ویب پاڼه باندې لیکلي چې له حکومت سره مربوط دوه تنه اختطافیان یې نیولي دي.
دوی ادعا کړې چې دا کسان یې د فراه ښار اړوند رحمان قلعه سیمه کې له اسنادو سره نیولي دي.
“د فراه ولایت د مرکز فراه ښار اړوند د رحمان قلعه سیمي اوسیدونکي ( عبدالمجید د حمیدالله خان زوی او عبدل د مومن زوی ) د اسلامي امارت د ځانګړي عملیاتو په ترڅ کې ژوندي ونیول شول”
طالبان وایي چې نیول شوي کسان په فراه کې د انسان تښتونې وسلواله ډله لري او په وینا یې چې له دوی سره د ولایت د مقام ځانګړي کارتونه هم موجود دي.
د طالبانو په ټکو: ” دواړه نیول شوي سړي په فراه ښارکې د انسان تښتوني وسلواله ډله لري او د یاد ولايت د مقام ځانګړي کارتونه او اسناد هم ورسره ؤ چې د سیمي ډير شتمن خلک او تجاران یې د کابل ادارې د همدي ولایت د چارواکو په همغږي سره اختطاف کول او بیا به یې د پیسو په مقابل کې خوشي کول”
طالبانو همدا راز ویلي چې نیول شویو کسانو په خپلو جرمونو اعتراف کړی چې له مخې یې دوی خپلې شرعي محکمې ته سپارلي دي.
دا په داسې حال کې ده چې څو ځل مخکې هم په اختطافونو او غلاوو کې حکومتي کسان ښکېل بلل شوي دي.
