(کابل ټکی کام، ۱۳۹۸، زمری ۱۵)
طالبانو د یوې اعلاميې په خپرولو سره له خلکو غوښتي چې ټاکنو کې دي ګډون نه کوي او یاده پروسه يې يوازې تش په نامه او غولوونکې بللې ده.
طالبان وايي، د ټاکنیزو پروسو اکمال، رهبري، نظارت او پريکړې د بهرنيانو په اختيا رکې دي زياتوي: “د ټاکنو پروسه یوازې د خلکو سترګو ته خاورې شیندل او د عامه ذهنیت تیرایستل دي، ځکه هر څوک په دې پوهیږي چې د اشغال تر سیوري لاندې ټاکنو کې د ولسي ارادې پر ځای د اکمالوونکو بهرنیانو اراده او انتخاب ټاکونکی رول لري”.
طالبانو د ۲۰۱۴م کال ټاکنو ته په اشارې ويلي چې ميليونونه ډالره پکې مصرف شول خو نهايي پريکړه يې بيا هم د هغه وخت د امريکا د بهرنيو چارو د وزير جان کيري له خوا وشوه او حکومت مشرۍ ته يې دوه تنه انتخاب کړل.
اعلاميه کې راغلي، هیوادوال باید بیا بیا د مکارو سیاسیونو د فریب ښکار نشي او نه دې هم په هغه پروسه کې ګډون کوي چې د دوی رایې په کې هیڅ اعتبار او ارزښت نه لري.
طالبانو ويلي، دا چې د اشغال د پای ته رسيدلو مذاکرات او د بين الافغاني تفاهم لپاره ترتيبات روان دي نو په دې خاص وضعيت او شرائطو کې ټاکنې د وخت، پيسو او امکاناتو بې ځايه ضایع کول دي.
په اعلاميه کې په ټولو هيوادوالو غږ شوی چې په ټاکنو، ټاکنيزو کمپايني غونډوکې ځکه برخه وانخلي چې اشغالګر او ګوډاګيان د خپل اعتبار د زياتولو لپاره ترې استفاده کوي “ موږ باور لرو چې اولس به د پخوا په شان په خپل سرتاسري پریکون سره د اشغالګرو دا پروسه هم شنډه او خنثی کړي”.
اعلامیه کې طالبانو ته لارښوونه شوې چې په ټول توان دې د دې پروسې مخه ونیسي “ اسلامي امارت په ټول هیواد کې مجاهدینو ته لارښوونه کوي چې په ټول توان سره د دښمن د دغې نمایشي او جعلي پروسې په مقابل کې ودریږي او دښمن پرینږدې چې په خپل دغه شوم پلان کې بریالی شي ” او له خلکو غوښتل شوي چې کمپايني غونډو ته ورنشي څو زيان ورته وانوړي ځکه چې د بريدونو او زیان خطر لري.
