کابل ټکی کام (چهار شنبه، ۱ لړم ، ۱۳۹۸ل)
د ناټو عمومي منشي ینس سټولټنبرګ وایي، دوی د افغان سولې خبرو د بیا پیلېدو ملاتړ کوي او طالبان باید خپله لیوالتیا وښیي.
هغه د ناټو د دفاع وزیرانو د غونډې تر پیلېدو مخکې وویل، ناټو په افغانستان کې خپل ماموریت ته ژمنه ده او یاد ماموریت به طالبانو سره تر توافق پورې دوام کوي.
هغه دغه راز په افغانستان کې د داعش ډلې د موجودیت په اړه وویل، دا ډله هڅه کوي په دې هېواد کې د پښې ځای پیدا او له دې ځایه خپلو شومو موخو ته ځان ورسوي خو په خبره یې، دوی په دې برخه کې له افغان ځواکونو سره ولاړ دي.
سټولټنبرګ زیاته کړې، دوی له امریکا سره یو ځای افغانستان ته تللي او که چېرته اړتیا ولېدل شي نو له هغوی سره یو ځای به له دې هېواده خپل سرتېري وباسي.
د یادونې وړ ده، دناټو عمومي منشي داسې مهال په طالبانو دسولې غږ کوي چې دامریکا ځانګړي استازي له اوږد ځنډ وروسته یوځل بیا خپل سفر پیل کړی، تمه ده چې یاد مذاکراتي ټیمونه یوځل بیا نږدې ورځو کې سره جرګه شي.
