ارګ کې دجنسي ځورونو له ادعاوو وروسته د بشري حقونو کمیسیون یوه پیښه مستنده کړې
کابل ټکى کام (دوشنبه، ۲۷ لړم ، ١٣٩٨ل)
د افغانستان د بشري حقونو خپلواک کمېسیون وايي، په ارګ کې د جنسي ځورونې د ادعاوو په تړاو د څېړنو په ترڅ کې تر اوسه یوه پېښه مستند شوې ده.
د دغه کمېسیون غړې شبنم صالحي د دوشنبې په ورځ ازادي راډيو ته ویلي، هغه پلاوی چې د ولسمشر د فرمان له مخې د دغو ادعاو د څېړلو په هدف ټاکل شوی و، دې نتیجې ته رسېدلی چې له مطرح شویو ادعاګانو د یوې په اړه یې اسناد موجود دي.
صالحي وویل، ټاکل شوي پلاوي په یو شمېر دولتي او غیر دولتي ادارو کې د جنسي ځورونې اته نورې قضیې هم مستندې کړي دي.
د بشري حقونو کمېسیون د کمېشنرې د معلوماتو له مخې، په ټوله کې د جنسي ځورونې له ادعاو، پنځه په ولایتونو او څلور په کابل کې دي.
دا کمیسیون زیاتوي،”موږ ۹ قضیې په درېیو میاشتو کې ترلاسه کړې دي چې موږ بیا دغه ۹ قضیې مستند سازي هم کړې، په ځینو قضیو کې موږ وتوانېدو چې د ثبوت وسایل پیدا کړو خو په ځینو کې نه.”
که څه هم اغلې صالحې په دې اړه ډېر جزئيات نه ورکوي، خو وايي چې مستند شوي موارد د دولتي ادارو په بېلابېلو سطحو کې دي.
شپږ میاشتې مخکې د افغانستان د ولسمشر پخواني امنیتي سلاکار حبیب الله احمدزي ادعا وکړه چې، په ارګ کې ځیني دولتي کارکونکي د فحشا د ترویج لپاره کار کوي.
ارګ دغه ادعا رد کړه خو وروسته یې د بشري حقونو خپلواک کمېسیون په همکارۍ یو پلاوی جوړ کړ، تر څو دغه ادعاوې وڅیړي.
په ورته وخت کې یو شمېر مدني فعالانې د بشري حقونو خپلواک کمېسیون دغه ګام ستايي خو ټینګار کوي چې دغه کمېسیون دې په قضايي ادارو کې هم ددغو دوسیو له څېړنو څارنه وکړي.
