غورځنګ
غرب له څو سوو کلونو راهيسې چې مسلمانانو توره پرېښې او په اصطلاح قلم ته يې مه کړې له هغه راهيسې د ډيموکراسۍ لپاره ډول ډول تبليغات کوي، کله يې د ښځو د حقوقو په بڼه پر مسلمانانو ورتپي او کله يې هم بيا د بشر د حقونو تر عنوان او شعار لاندې مسلمانانو ته ستاينې او صفتونه کوي.
له هماغه پيل راهيسې غرب په هر ډول پر اسلامي نړۍ د خپلې ډيموکراسۍ د ترويج هڅه کړې خو کله چې مسلمانانو پوره او بشپړه ورسره ونه منله نو يې پر زياترو اسلامي هېوادونو خپل نظامي يرغلونه پيل کړل چې د هغو له جملې څخه يې يو افغانستان دی.
پر افغانستان باندې امريکايانو له خپل راتګ سره سم يوه لاسپوڅې اداره وتپله او بيا يې ورته د جمهوريت نوم د دې لپاره ورکړ چې له دغه نامه سره مسلمانان څه نا څه اشنا وو او په نورو اسلامي ممالکو يې هم تجربه کړی ؤ. د جمهوريت تر څنګ يې ورته اسلامي جمهوريت هم د دې لپاره ووايه چې ګواکې په دې نامه به دافغانستان مؤمن ولس وغولوي.
دا چې پر افغانستان باندې د امريکايي يرغل نولس کال روان دی نو له هماغه پيل راهيسې د غرب راوړې ډيموکراسي ورو دلته رسوا کېږي او خلک ورڅخه زړه توري کېږي، يوازې دا نه چې د افغانستان مسلمان له دغه ډول ډيموکراسۍ بې زاره کېږي بلکې د نړۍ هغه مسلمانان چې لا تر اوسه هم تر جمهوريت او ډيموکراسۍ لاندې ژوند تېروي؛ په افغانستان کې د ډيموکراسۍ جنازه ګوري چې ورو ورو ورځي او د غرب دغه دسيسه او د مسلمانانو د ګمراه کولو مفکوره په کوم ډول پوچه خېږي؟
نو په دې اساس غرب دې نور په اسلامي باندې د خپلو يرغلونو د ترويج او خپلو افکارو د رائج کولو لپاره د ډيموکراسۍ پوچه نغاره نه ډنګوي، يا دې د خپل يرغل ټغر ټول کړي او يا دې هم بديله لار ورته ولټوي.
ځکه چې غرب خپل هغه څو سوه کلن پلانونه د ډيموکراسۍ په پوچه او بې کاره مفکوره او په افغانستان کې د جمهوريت د فاسد نظام په وجه له منځه يووړل او رسوا يې کړل.
په افغان امریکايي جګړه کې که څه هم افغانانو زيات زيانونه او ناخوالې وګاللې خو تر دې زيات زیانونه امريکا او نورې صليبي نړۍ وګاللې ځکه چې خپله د زیات عمر راهيسې پيل کړې خواري يې د همدې جګړې پر اساس له منځه يووړه.
نو ځکه خو دې امريکا او نوره صليبي نړۍ نور ډيموکراسۍ بې معنا او د انسان وژنې نغاره نه ډنګوي بلکې خپل يرغليز او هر اړخيز ټغر دې نور له اسلامي نړۍ او خصوصاً له افغانستان څخه ټول کړي تر څو يې تاريخي بايللی حيثيت نور تاواني نشي.
