کابل ټکی کام (یکشنبه، ۶ وږی، ۱۴۰۱ل)
د اسلامي امارت په مشرۍ د افغان سرپرست حکومت د دفاع وزیر او د طالبانو د اسلامي تحریک د بنسټګر ارواښاد ملا محمد عمر مجاهد زوی “ملا محمد یعقوب مجاهد” پر ګاونډي هیواد
پاکستان غږ کړی، چې د افغانستان پر ضد د خپلې فضا له کارولو ډډه وکړي.
ملا محمد يعقوب مجاهد چې نن یې کابل کې ملت ته د حساب ورکولو غونډې ته خبرې کولې وویل چې د افغانستان په فضا کې د امريکايي بې پيلوټه الوتکو ګرځيدل پر افغانستان تېری دی او په وينا يې چې دا خبره يې په ځلونو امريکايي چارواکو ته ور ياده کړې ده.
نوموړي وویل چې لومړني معلومات يې دا دي چې افغانستان ته امريکايي بې پيلوټه الوتکې د پاکستان له فضا را اوړي او پر اسلام اباد يې غږ وکړ چې د افغانستان پر ضد د خپلې فضا د کارول کېدو مخه ونيسي.
نوموړي د خپلو خبرو پر دوام ویلي، چې د جمهوريت د سقوط پر مهال شمالي ګاونډيو ته د افغانستان د هوايي ځواک د تښتول شويو الوتکو د راستنولو په تړاو يې هڅې روانې دي.
د ملي دفاع وزارت سرپرست وويل چې له افغانستانه ايستل شوې الوتکې د افغانانو ملکيت دی او دوی يې د راستنولو له غوښتنې هیڅکله تېرېدونکي نه دي.
