احمد الهام
که څه هم د اسلامي امارت په مشرۍ افغان سرپرست حکومت د متقابل احترام په چوکاټ کې د سیمې او نړۍ له ټولو هیوادونو سره بیا بیا پر مثبت تعامل ټینګار کړی؛ خو ګڼ شمېر هندي رسنیو واک ته د اسلامي امارت له رسېدو وروسته د افغان حکومت پر خلاف منفي تبلیغات پیل کړي دي.
ځینې هندي رسنۍ خو په ښکاره ډول د احمد مسعود په مشرۍ د تش په نوم “جبهه مقاومت” ملاتړ کوي او داسې ښیي چې ګواکې له صحنې وتلې دغه ډله کولی شي چې د افغان ځواکونو پر وړاندې مقاومت وکړي سیمې ترې ونیسي او یا په بل عبارت افغان حکومت وننګوي حال دا چې ځمکني حقایق بیا ډیر بدل دي یاده ډله چې ټول مشران یې
په غربي هیوادونو کې میشت دي حتی پلویان یې د افغانستان په یوه کوچني کلي هم کنټرول نه لري او چې چیرته یې سر را پورته کړی د میړنیو افغان ځواکونو لخوا ټکول شوي او د اوس لپاره د هېواد په هېڅ کومه برخه کې وسله وال بغاوت شتون نلري.
د کارپوهانو په آند هندي رسنۍ د هندوستان د حکومت لخوا د اسلامي امارت پر وړاندې منفي تبلغاتو ته هڅول کېږي، ترڅو د افغان ولس ته وښیي چې د دوی په خبره “طالبان” پردۍ مفکوره لري، واک یې انحصار کړی، د ښځو حقوق یې تر پښو لاندې کړي حال دا چې هندوستان د نړۍ لومړنی هیواد دی چې ښځو ته په کې ان د انسان په سترګه هم نه کتل کیږي د هندي رسنیو د خپلو راپورونو له مخې په دغه هیواد کې هره ورځ په لسګونو مېرمنو جنسي تیري کیږي، مجرمینو ته سزا نه ورکول کېږي او تر لنډ بند وروسته بېرته خوشې کیږي.
واک ته د اسلامي امارت تر رسیدو وروسته ما “لیکوال” د هندي رسنیو لسګونه راپورونه او تحلیلونه کتلي چې په کې د افغان حکومت خلاف منفي تبلیغات کېږي او که تېر ته وکتل شي هندوستان د اسلامي امارت په تېره دوره کې په ښکاره ډول د احمد شاه مسعود په مشرۍ د شمال ټلوالې ملاتړ کاوه، چورلکې به یې پنجشیر ته راتللې او په مجاهدینو به یې بمباري کوله.
د تېر شل کلن امریکایي اشغال پر مهال هم هندوستان په مستقیم او غیر مستقیم ډول د افغانستان په اشغال کې ونډه لرله او داسې ګڼ موارد او شواهد شته چې هندي الوتکو به په مجاهدینو هوایي بریدونه کول.
د ځینو په آند هندوستان هڅه کوي چې په داسې کړنو د پاک_افغان ملتونو ترمنځ واټڼ رامنځته کړي هغه دوه مسلمان ملتونه چې ترمنځ یې ډېر مشترکات شتون لري، یو او بل ته اړ دي او کله به یې هم څوک په ویشلو بریالي نه شي” ان شاءالله”
یادونه: کابل ټکی کام کې هره خپرېدونکې مقاله د لیکوال خپل نظر دی د ادارې توافق ورسره شرط نه دی.
