کابل ټکی کام (دوشنبه، ۲۹ جوزا، ۱۴۰۲ل)
د راپورونو له مخې د یونان په ساحل کې د نا قانونه کډوالو د یوې کښتۍ د ډوبیدو په پېښه کې اتیا کسان مړه او ۵۰۰ نور نادرکه شوي دي.
عربي 21 خبري آژنس د استخباراتي نړیوال سایټ “مارین ټرافیک” څخه د ترلاسه شوو معلوماتو له مخې خبر ورکړی، چې، کښتۍ د ډوبیدو څخه ۷ ساعته مخکې په سیمه کې خرابه ولاړه وه؛ خو چارواکي یې مرستې ته نه دي ورغلي.
د یونان حکومت تر اوسه ددې ادعا په اړه څه ندي ویلي؛ خو پرون یې ویلي و چې د کښتۍ د ژغورنې عملیات یې پیل کړي دي.
د یونان د ساحلي ګارډ ځواکونو ادعا کړې وه چې د پیښې په وخت کې کښتۍ د ایټالیا په لور روانه وه. دغه راز دوی ادعا کړې وه چې له دوی څخه کښتۍ د مرستې غوښتنه نه وه کړې او بل دا چې په کښتۍ کې سپاره کسان تر وروستۍ شیبې پورې له جدي خطر سره نه و مخامخ.
د ویلو ده چې د جون په ۱۴مه نېټه هم د کب نیولو یوه کښتۍ چې ناقانونه کډوال پکې سپاره وو، د یونان په” پیلوپونیس” ټاپو کې په نړیوالو اوبو کې ډوبه شوې وه.
په پېښه کې ۷۹ کسانو خپل ژوند له لاسه ورکړی وو او ۱۰۴ کسان نور ژغورل شوي او کلاماتا بندر ته وړل شوي و. دغه راز په هغې پیښه کې په سلګونو تنه لا درکه شوي هم و چې ګڼ یې لا تر اوسه هم نه دي موندل شوي.
