کابل ټکی کام (دوشنبه، ۲۹ جوزا، ۱۴۰۲ل)
د افغانستان د اسلامي امارت حکومت سترې محکمې اعلان وکړ چې د راتلونکې اوونۍ چارشنبه به د لوی اختر لومړۍ ورځ وي.
د افغانستان سترې محکمې اعلان کړی وايي، چې د قاضي القضات شیخ عبدالحکیم حقاني په مشرۍ د میاشت لیدو مرکزي کمېټې ته د ذو الحجې میاشتې د لیدل کېدو معتبر شهادتونه رسیدلي او پر دې اساس نن دوشنبه د ذو الحجې لومړۍ نېټه ده.
په اعلان کې راغلي:(د راتلونکې اوونۍ چهار شنبې ورځ د ۱۴۴۴ هـ.ق کال د ذو الحجې میاشتې لسمه چې د ۱۴۰۲ هـ. ش کال دسرطان میاشتې له ۷ مې نېټې سره برابره ده، دلوی اختر لومړۍ ورځ ده.)
تر دې مخکې د کندهار ولايت مطبوعاتي دفتر ويلي و چې په دغه ولايت کې د مياشت ليدنې کميټې له لوري په پرمختلليو دوربينونو باندې د مياشت ليدنې هڅې روانې دي.
