کابل ټکی کام (دوشنبه، ۹ زمری، ۱۴۰۲ل)
د قطر پلازمېنه دوحه کې د اسلامي امارت او امریکایي پلاویو تر منځ دوه ورځنۍ ناسته پای ته ورسېده او دواړو لوریو په خپلو منځو کې د باور جوړونې په موخه د ورته ناستو پر دوام ټینګار وکړ.
اسلامي امارت د یوې خبرپاڼې په خپرولو سره ویلي، چې پلاوي یې په دې ناسته کې له امریکایي لوري غوښتي څو له تورو لېستونو د طالب مشرانو نومونه وباسي او پر خپلو پښو د اقتصاد درولو په موخه د افغانستان بانکي زیرمې ازادې کړي.
خبرپاڼه کې راغلي، په دې ناسته کې د دواړو لوریو تر منځ د باور جوړونې او په دې برخه کې د عملي ګامونو اخیستلو، د تورو لېستونو او بندیزونو لیرې کولو، د افغانستان د اقتصادي ثبات ساتلو، د مخدره توکو پر ضد د مبارزې، د نړۍ هره برخه کې افغانانو ته د قونسلي خدماتو رسولو او بشري حقونو پر موضوعاتو هم خبرې شوې دي.
خبرپاڼه کې راغلي چې د افغانستان سرپرست حکومت پر بانکونو د زیاتره محدودیتونو له لیرې کیدو هرکلی کړی او د معاملاتو د اسانه کیدو په برخه کې یې یو ښه ګام بللی دی.
په دې ناسته کې د افغانستان د سرپرست حکومت پلاوي مشري امیرخان متقي کوله او د مالیې وزارت او افغانستان بانک د استازو سربېره قطر کې د افغانستان سفارت او سیاسي دفتر استازو هم برخه لرله.
د امریکا پنځلس کسیز پلاوي مشري توماس وېسټ کوله او د خبرو لپاره کمېټې ټاکلې شوې وې.
دا مذاکرات پرون یکشنبه پیل شوي او نن دوشنبه پای ته ورسېدل خو د چارو کارپوهان او له مذاکراتو باخبره سرچینې وایي چې په دې مذاکراتو کې دواړو لویو پر ځینو پټو مسایلو خبرې کړې دي.
