رفح؛ د حماس ځواکونو او صهیونیستي اشغالګرو ترمنځ خونړۍ نښتې روانې دي

کابل ټکی کام (چهارشنبه، ۱۹ ثور، ۱۴۰۳ل)
د المیادین خبري آژانس د خبر له مخې د غزې تړانګې “رفح” ښار ګوټي کې د حماس ځواکونو او صهیونیستي اشغالګرو ترمنځ خونړۍ نښتې روانې دي. دا په داسې حال کې ده، چې له وړمې ورځې راهیسې اسراییلي ترهګر ريژیم پر رفح ښار هوایي او ځمکني عملیات پیل کړي دي. غزه کې د حماس اسلامي غورځنګ د پوځي څانګې “القسام” لېوا سرچینو رسنیو ته ویلي، چې د اسراییلو تر یرغل وړاندې یې رفح کې د خپلو ځواکونو شمېر کې زیاتوالی راوستی و او دا مهال د یاد ښار په بېلا بېلو سیمو کې د صهیونیستي یرغلګرو سره درنه جګړه روانه ده. فلسطیني رسنیو داسې ویډیوګانې خپرې کړي، چې پکې د صهیونیستي پوځ د ټانکونو ویشتل ښودل کېږي. د ویلو ده، چې غزه کې د حماس اسلامي غورځنګ لوړ پوړي پوځي قوماندان “یحیی سنوار” هم خبرداری ورکړی، چې رفح به د صهیونستان په هدیره بدله شي.