کابل ټکی کام (یکشنبه، ۱۰ چنګاښ، ۱۴۰۳ل)
په داسې حال کې، چې د حزب الله او اسرائیلو تر منځ کړکیچ زیات شوی او د لبنان په جنوب کې د اسرائیلي پوځ له خوا د یوه لوی برید د احتمال په اړه اندیښنې زیاتې شوي، العربیه تلویزیوني شبکې خبر ورکړی، چې د لبنان په جنوب کې د اسرائیلو د بې پیلوټه الوتکې په برید کې د حزب الله یو مهم قوماندان وژل شوی دی. د حزب الله غورځنګ اړوند “المنار” تلویزیوني شبکې د یادې ډلې د پوځي سرچینو په حواله خبر ورکړی، چې د “علي حسیني” په نامه دغه قوماندان یې د جګړې له لیکو کور ته پر لاره و، چې د جنوبي لبنان په “حسیبه” سیمه کې یې موټر د صهیونیستي اشغالګرو لخوا هدف وګرځول شو. که څه هم حزب الله د خپل دغه لوړ پوړي قوماندان په هکله له ډېر څه ویلو ډډه کړې ده؛ خو د اسرائیلي پوځ ویاند ادعا کړې، چې نوموړي په تېرو شپږو میاشتو کې د لبنان-اسرائیلو پر پوله په اسرائیلي پوځیانو ګڼ بریدونه طرحه کړي وو. د یادونې وړ ده، چې دا لومړی ځل نه دی، چې اسرائیل د حزب الله غورځنګ مهم غړی په نښه کوي، بلکې تر دې وړاندې یې هم د یاد غورځنګ لسګونه مهم قوماندانان وژلي دي.
