کابل ټکی کام (پنجشنبه، ۳ لړم، ۱۴۰۳ل)
له هغه وروسته، چې تېره ورځ د ترکیې په پلازمېنه “انقره” کې د فضایي-دفاعي صنعت پر یوه شرکت خونړۍ برید وشو او په پایله کې یې ګڼ شمېر کسانو ته مرګ ژوبله واوښته، د ترکیې د وسله والو ځواکونو مرکزي قوماندانۍ خبر ورکړی، چې عراق او سوریه کې به د کرد یاغیانو پر وړاندې پراخ پوځي عملیات پیل کړي.
د ترکیې دفاع وزارت بیا د یوې اعلامیې په خپرولو سره ادعا کړې، چې د عراق او سوریې په شمال کې یې د هوایي بریدونو په پایله کې د کرد وسله والو ۳۲ مرکزونه ویجاړ کړي او سلګونو وسله والو ته یې مرګ ژوبله اړولې ده.
د یادونې وړ ده، چې د دغه برید مسؤلیت تر اوسه کومې ډلې نه دی منلی؛ خو ترکیه دا برید د کردانو د کارګر ګوند یا پي کې کې کار بولي.
