کابل ټکی کام (سه شنبه، ۲۰ لیندۍ، ۱۴۰۳ل)
د نړیوالو رسنیو د راپورونو له مخې تېرو ۲۴ ساعتونو کې صهیونیستي اشغالګرو په سوريه کې پر۳۰۰ اهدافو هوايي بريدونه کړي، چې د سوريې هوايي ځواک ته يې درانه تلفات اړولي دي.
د سوريې د بشري حقونو د څار لندن میشتي سازمان د یوې خبر پاڼې په خپرولو سره ویلي، چې په دې بريدونو کې د سوريې لویې او کوچنۍ نظامي الوتکې، هليکوپټرې او د دافع هوا سيستم په بشپړ ډول له منځه تللی دی.
اسراييلي پوځ ادعا کړې، چې له خپل پخواني دوښمن “بشارالاسد” څخه پاتې شوي تجهيزات او وسلې له دې وجې ويجاړوي چې بېرته د دوی پر ضد ونه کارول شي؛ د تحریرالشام په مشرۍ د سوريې نوي موقت حکومت تر اوسه د اسرائیلو ځپونکو بريدونو ته کوم غبرګون نه دی ښودلی.
د ویلو ده، چې په ۲۰۱۱م کال کې د سوریې د کورنۍ جګړې د پیل راهیسې صهیونیستي اشغالګرو د یاد هېواد په پوځي تأسیساتو زرګونه بریدونه کړي دي؛ خو د سوریې پخواني حکومت دمشق او نورو سیمو کې د دافع هوا سیستم له لارې د صهیونیست ريژیم ډیری بریدونه شنډول. د کتوونکو په باور صهیونیستي ريژیم بشارالاسد د فلسطیني مقاومتي ډلو په ملاتړ تورن کړی و او هغه مهال یې ځکه پر سوریې بریدونه کول؛ خو دا چې اوس د اسد حکومت پرځیدلی او نوموړی له هیواد څخه وتلی ده او بیا هم د صهیونیستي ريژیم بریدونه دوام لري. نو دا د دې ښکارندوي کوي، چې اسرائیلو یوازې اسد سره دوښمني نه درلوده، بلکې د سوریې دوښمنان دي او د یاد هېواد، چې لا له وړاندې یې برخلیک تت او په څو برخو ویشل شوی د اشغال کولو هڅې کوي.
