کابل تکی کام (پنجشنبه، ۱۶ کب، ۱۴۰۳ل)
د راپورونو له مخې، د کډوالو او بېرته راستنېدونکو چارو وزیر مولوي عبدالکبیر په جلا جلا ناستو کې په کابل کې د ایران له سفیر علیرضا بېګدلي او د پاکستان له سفیر عبيدالرحمن نظاماني سره په يادو هېوادنو کې د افغان کډوالو پر ستونزو، ګډې همکارۍ او په تورخم کې پر روان وضعيت خبرې اترې کړي دي.
د ياد وزارت له لوري په خپره شوې خبرپاڼه کې د يادو هېوادنو له سفيرانو مننه کړې چې له کلونو راهيسې يې د ميليونونو افغان کډوالو کوربه توب کړی زياته کړې چې په وروستيو کې په يادو هېوادنو کې له افغان کډوالو سره ناسم چلند ډېر شوی او له هغوی يې غوښتي چې د کډوالو نړیوال اصول مراعت کړي او له افغانانو سره انساني او اسلامي چلند وکړي.
خبرپاڼه کې راغلي:«اسلامي امارت افغان کډوال هېواد ته راستنېدو ته هڅوي، خو په کور دننه د شرایطو د نه برابرېدو له امله باید کوربه هېوادونه د جبري ایستلو پر ځای د یو منظم او تدریجي میکانیزم له مخې عمل وکړي.»
نوموړي ټینګار وکړ، چې د جون تر پایه له پاکستان څخه د ټولو افغان کډوالو ایستل ستونزمن دي، ځکه هغوی نشي کولی خپل ټول ژوند او شتمنۍ په دومره لنډ وخت کې راټولې کړي. نوموړي له کوربه هېوادونو وغوښتل، چې د ګډو میکانیزمونو په اساس دې افغان کډوالو ته وخت ورکړل شي چې په دې برخه کې دوه اړخیزې او درې اړخیزې ناستې اړینې دي.
دغه ښاغلي مولوي عبدالکبیر هیله څرګنده کړه چې د دواړو هېوادونو تر منځ د جزیي ستونزو لپاره دې د خبرو لاره غوره شي، د تورخم بندول، جګړه او تاوتریخوالی یې حل لاره نه ده، په تورخم کې دې له تخریبي عمل ډډه وشي، د تورخم دواړو غاړو ته زرګونه مسافر، ناروغان، جنازې او د سوداګرو مالونه بند پاتې دي نو په دې اړه دې جدي اقدام وشي څو دواړو لورو ته ډېر زیان ونه رسېږي.
په ورته وخت کې، په کابل کې د پاکستان سفیر مولوي عبدالکبیر ته ډاډ ورکړی، چې د اسلامي امارت غوښتنې به په رسمي ډول له پاکستاني چارواکو سره شریکې کړي. هغه وویل، د پاکستان راتلونکی له افغانستان سره تړلی دی، له همدې امله افغان کډوالو څخه د سیاسي ابزارو په توګه ګټه نا اخلي، بلکې غواړي چې ستونزې د تفاهم له لارې حل شي.
همدارنګه په کابل کې د ایران سفیر ښاغلي علیرضا بیګدلي وویل، چې د ایران اسلامي جمهوریت له قانوني کډوالو سره د همکارۍ هڅې کوي، خو د ناقانونه کډوالو ستونزې ته باید دایمي حللارې پیدا شي. نوموړي زیاته کړه چې د افغانستان او ایران ښو اړیکو ته په کتو، اړینه ده چې دواړه هېوادونه په ګډه د افغان کډوالو د ستونزو د حل لپاره لازم اقدامات وکړي. موږ غواړو چې په ایران کې مېشتو ناقانونه کډوالو ته د اړتیا وړ قانوني اسناد ورکړل شي.
په يادو غونډو کې دواړو خواوو ټینګار وکړ، چې د کډوالو مسئله باید د سیاسي مسایلو څخه جلا وساتل شي او د حل لپاره يې هېڅې وشي.
