کابل ټکی کام (شنبه، ۱۵ وږی، ۱۴۰۴ل)
د یمن د وسلهوالو ځواکونو ویاند جنرال یحیی سریع په خپلو تازه څرګندونو کې ویلي، چې د غزې له مظلوم ولس او مقاومت سره به تر وروستۍ سلګۍ ولاړ یو.
نوموړي، چې تېره ورځ یې د غزې په ملاتړ میلیوني لاریون او د حضرت محمد صلی الله علیه وسلم د مبارکې زوکړې د ورځې په مناسبت جوړو شویو مراسمو ته وینا کوله ټینګار وکړ، چې یمن د فلسطین قضیه یوازې د فلسطینیانو قضیه نه بولي، بلکې د ټول اسلامي امت ګډه قضیه او مقدس مسؤولیت ګڼي. د هغه په خبره د غزې د ملاتړ په برخه کې یمن د هر ډول قربانۍ لپاره چمتو دی او د اشغالګرو پر وړاندې به د مقاومت تر څنګ ولاړ وي.
هغه زیاته کړه چې د صهیونیستي رژیم جنایتونه، د ښځو او ماشومانو شهیدانول، د ښارونو ورانول او د خلکو محاصره به د مسلمانانو د ارادې ماتولو پر ځای د هغوی د ایمان او مقاومت روحیه لا پیاوړې کړي.
د یمن د وسلهوالو ځواکونو ویاند په نړیوالو ټولنو او اسلامي هېوادونو غږ کړی، چې د غزې د محاصرې د ماتولو او د فلسطین د آزادۍ لپاره عملي ګامونه پورته کړي، ځکه د ده په وینا، د امت سکوت به د تاریخ په پاڼو کې د خیانت په نامه ثبت شي.
سریع څرګنده کړې: “موږ په غزه کې د مقاومت او مظلوم ولس ترڅنګ ولاړ یو، او زموږ ملاتړ به تر هغه دوام ولري څو، چې فلسطین په پشپړه توګه خپلواکي نه وي ترلاسه کړي.
