کابل ټکی کام (شنبه، ۱۵ وږی ۱۴۰۴):
د امریکا ولسمشر ډونالډ ټرمپ په یوه تازه اجرايي فرمان کې د دغه هېواد د دفاع وزارت نوم د «جګړې وزارت» ته بدل کړ.
ټرمپ او د هغه دفاع وزیر، پيټ هګسټ دا بدلون د امریکايي پوځ د ریښتیني ماموریت د څرګندولو لپاره اړین بللی دی.
ټرمپ د فرمان د لاسلیک پر مهال وویل، چې دا بدلون یوازې په نوم نه، بلکې د پوځ په روحیه او تګلاره کې مهم بدلون راولي. نوموړي ټینګار وکړ، چې د دغه وزارت موخه یوازې دفاع نه، بلکې د امریکا د ملي ګټو د خوندیتوب لپاره «فعاله جګړه» ده.
رویټرز لیکلي، که څه هم دا پرېکړه د کانګرس د تایید اړتیا لري، خو په سمدستي توګه د امریکا او پوځي اډو په لوګوګانو او رسمي اسنادو کې بدلون راغلی دی، چې دا به د زیات مالي لګښت لامل شي. د شنونکو په وينا، له دویمې نړیوالې جګړې وروسته وزارتونه د «جګړې» پر ځای د «دفاع» په نوم یادېدل، څو د جګړې پر ځای د سولې او مخنیوي پیغام ورکړل شي.
