د ۲۰۲۳ ميلادي کال د اووم اکتوبر له پېښې وروسته، ټوله نړۍ د صهیونیستي رژیم د وحشیانه بریدونو او د بشریت ضد کړنو ژوندۍ شاهده ده. غزه پر يوه داسې سيمه بدله شوه، چې له نوم سره يې د خلکو ذهن ته وحشت او ظلم راځي، هلته په تېرو دوه کلونو کې لسګونه زره بې ګناه وګړي، په ځانګړې توګه ښځې او ماشومان، په بېرحمانه ډول شهیدان شول، روغتونونه او ښوونځي بمبار شول او د ژوند بنسټیزې اسانتیاوې په نښه شوې.
سره له دې چې په دې جګړه کې فلسطیني ملت ته پراخ ځاني او مالي زیانونه واوښتل او د حماس ګڼ شمېر مشران شهیدان شول، خو دوی وتوانېدل چې د نړۍ د ډیپلوماټیکو کړکیچونو تر منځ د فلسطین قضیه بیا ژوندۍ کړي. په تېرو څو میاشتو کې ګڼ شمېر هېوادونو په رسمي ډول فلسطین د خپلواک دولت په توګه وپېژانده. دا د فلسطیني ولس د اوږدې مبارزې یوه ستره بریا ده او د یو خپلواک فلسطین د رامنځته کېدو عملي زمینه برابروي.
د ملګرو ملتونو په ۸۰ مه سرمشریزه کې د صهیونیستي رژیم د لومړي وزیر وینا په مهال د استازو ډلهییز وتل، یوازې یو اعتراض نه و، بلکې دا د نړیوال سیاست په تاریخ کې یوه مهمه شیبه وه. د نړۍ استازو په عملي ډول نړۍ ته وښوده چې نور د ظلم د توجیه وخت تېر شوی دی. دا پېښه صهیونیستي رژیم ته د ډیپلوماټیکو محاذونو په کچه ستره ضربه وه، ځکه چې د نړۍ غوڅ اکثریت په ښکاره ډول د فلسطین د خپلواکۍ تر څنګ ودرید.
نن ورځ فلسطین یوازې د یوه جغرافیایي واحد نوم نه دی پاتې، بلکې د بشري ارزښتونو، عدالت او وجدان سمبول ګرځېدلی دی. د فلسطین د آزادۍ مبارزه د نړۍ د ټولې نړۍ ګډ غږ ګرځېدلی او دا روښانه کوي چې ظلم، اشغال او نسلوژنه د تل لپاره نشي پاتې کېدای.
په حقیقت کې، د فلسطین د مبارزې پیغام نړیوال دی: هر ملت چې د ازادۍ لپاره قرباني ورکوي، هغه نه یوازې خپل تاریخ لیکي بلکې ټول بشريت ته د ازادۍ درس ورکوي. د فلسطیني ملت بې سارې قربانۍ اوس د نړۍ د وجداني بیدارۍ سرچینه ګرځېدلې ده، او دا د یو خپلواک فلسطین د جوړېدو لپاره تر ټولو قوي تضمین دی.
نن نړۍ د دې غوښتنه کوي چې فلسطین باید خپلواک دولت شي، ځکه دا یوازې د فلسطین د خلکو حق نه دی، بلکې د نړیوال عدالت یوه اړتیا ده. د فلسطین قضیه نور یوازې د منځني ختیځ موضوع نه ده، بلکې د ټولې نړۍ قضيه ده.
په دې حساسو شرایطو کې د نړۍ د مسلمانانو او د بشري ټولنو دنده ده، چې د فلسطین د آزادۍ غږ لا پیاوړی کړي او د نړیوالو محاذونو له لارې د یو خپلواک دولت د جوړېدو ملاتړ وکړي. د اقتصادي او سیاسي فشارونو له لارې صهیونیستي رژیم د خپلو جرمونو د پای ته رسولو لپاره اړ کړي.
د غزې خلکو ته بشري مرستې ورسوي، څو د جګړې د درنو زیانونو جبران او د هغوی د مقاومت توان لوړ شي. د رسنیو او عامه ذهنیت په وسیله د فلسطین د مظلوم ولس غږ د نړۍ هر ګوټ ته ورسوي.
