کابل ټکی کام (يکشنبه، ۶ تله، ۱۴۰۴ل)
د ټایمز آف اسرائیل وېبپاڼې د امریکا ولسمشر ډونالډ ټرمپ د ۲۱-بنده وړاندیز مسوده خپره کړې، خو راپورونه وايي چې حماس تر اوسه دا سند نه دی تر لاسه کړی.
د راپور له مخې، دا وړاندیز د اسراییلو د لومړي وزیر بنیامین نتنیاهو په همغږۍ جوړ شوی او د هغه نږدې کس “ویتکوف” یې ځینې برخې د ټرمپ او اسراییلي مشرانو په غونډه کې وړاندې کړې دي.
شنونکي وايي چې دا سند د نتنیاهو د بري اعلان ته ورته دی، داسې بریا چې هغه د غزې پر وړاندې د جګړو او پراخو وژنو سره هم ترلاسه نه کړه. نتنیاهو اوس د کورني سیاسي کړکېچ، د پوځي ـ امنیتي ادارو له مخالفتونو او د نړیوالې انزوا له ستونزو سره مخ دی.
د حماس په اړه ویل کېږي چې د دې سند منل ډېر لږ احتمال لري، ځکه د هغوی په باور دا د صهیونیستي غوښتنو تکرار دی او د مقاومت د حقونو سره په ټکر کې دی.
شنونکي زیاتوي چې ټرمپ هڅه کوي د اسراییلي غوښتنو په پوره کولو ځان مطرح کړي، خو د حماس غبرګون د هغه په خوښه نه دی او د ګواښونو له امله نه بدلېږي.
