کابل ټکی کام (دوشنبه، ۵ لړم، ۱۴۰۴ل)
د وينزويلا حکومت د امريکا او ترينېداد او توباګو ګډ پوځي تمرينونه د سيمې د جګړې د پارولو هڅه بللې.
د وينزويلا د اعلامیې له مخې، امريکايي جنګي بېړۍ «يو اېس اېس ګرايفلي» له سمندري ځواکونو سره ترينېداد او توباګو ته رسېدلې او هلته د ګډو پوځي تمرينونو پلان لري. دغه جزیرهیي هېواد د وينزويلا له سواحلو يوازې ۱۳ ميله لرې پروت دی.
وينزويلا ويلي، يو شمېر بهرني مزدوران يې نيولي چې د دوی په وينا د امريکا د استخباراتي ادارې (CIA) سره تړاو لري.
دغه هېواد د امريکا او ترينېداد اقدام «پوځي تحريک» او د جګړې د پيل هڅه بللې ده.
له بلې خوا، د امريکا جمهوري غوښتونکي سناتور لينډسي ګراهام ويلي، د وينزويلا پر ضد د امريکا د ځمکنۍ حملې امکان ډېر شوی دی.
نوموړي زياته کړه، ولسمشر ډونالډ ټرمپ به ژر د وينزويلا او کولمبیا پر ضد د احتمالي پوځي عملياتو په اړه د کانګرس غړو ته معلومات ورکړي.
