همایون عیسی خېل
لومړۍ برخه
موږ ته به خپلو استاذانو د طالبۍ په زمانه کې ویل: د هر چا کتابونه مه ګورئ! بلکې لومړی تحقیق کوئ چې د کتاب لیکوال څوک دی؟ د کومې نظریې څښتن دی؟ هسې نه چې ګمراه مو کړي…! کله چې عالمان شئ بیا هر ډول کتاب مطالعه کوئ..!
نو مونږ به هم کوښښ کاوه چې د کتاب اخیستلو پر مهال د خپلو استاذانو یا نورو علماء کرامو سره سلا مشوره وکړو او لارښونه ترې واخلو… چې له امله به یې د ښه او بد توپیر په خورا اسانۍ کېده…
خو اوس چې د فیسبوک، یوټیوب، واټساپ او ټویټر زمانه شوه، د ښه او بد سړي ترمنځ توپیر ګران شوی. هر سړی( هغه که د هرې نظریې او مفکورې څښتن وي) ځانته آیډي، فیسبوک پاڼه، یوټیوب چینل او د واټساپ ګروپونه جوړوي. که څه هم په حقیقت کې د اسلام او مسلمانانو پټ دښمن وي؛ خو په ښکاره د دین دعوه کوي او په دې ډول خپل زهرجن تبلیغات د خلکو اذهانو ته انتقالوي.
په سوشل میډیا کې له حقاني علماء کرامو څخه مفسدین، د ازاد فکر خاوندان زیات نشریات کوي او نېټ ته له بل هرچا زیات لاس رسی لري.
د حقاني علماء کرامو رسنیو ته د نه راتګ ښایي غټ لامل دا وي چې، دوی د مجازي نړۍ(رسنیو) څخه کرکه کوي او تر خپلې وسې ترې ډډه کوي او نه غواړي چې فیسبوک یا نورو رسنیو ته لاس رسی ولري؛ ځکه چې دوی ورته د فساد او فتنې په نظر ګوري…
د دوی له جملې څخه ځینې په دې نظر دي چې سوشل میډیا کې د دعوت او اصلاح په نیت راښکاره کیدل د ریاي کارۍ، صنعت، ځان ښودنې، شهرت غوښتنې څخه خالي نه وي او همدا ډول په سوشل ميډیا کې د ویډیو او له عکس پرته مبارزه پر مخ نه وړل کیږي.
که څه هم زمونږ د دغو علماء کرامو خبره په خپل ځای د شریعت له نګاه نه سهي ده. ځکه چې هر څوک د رسنیو له لارې د چاپیریال اصلاح کوي،حتما به ویډیو یا تصویر(انځور) خپروي، چې د اکثرو علماء کرامو په نزد د موبایل تصویر هم د هغو تصویرانو په حکم کې راځي چې، شریعت ترې په سخته منع کړې ده.
خو بل لور ته هغه علماء کرام چې د سوشل میډیا له لارې د مسلمانانو د عقایدو، اعمالو او چاپیریال په اصلاح بوخت دي، په دې نظر دي چې سوشل میډیا (رسنۍ) د چاپېریال د اصلاح لپاره یوه اړینه وسیله ده او ترې لابدي ده؛
ځکه چې نن سبا ۹۰ سلنه ځوان کهول مو نېټ د موبایل یا په بلې وسیلې کاروي. کافران، ملحدین او یا د اسلام په جامه کې د اسلام دښمنان شپه، ورځ له دې لارې خپل تبلیغات خپروي، د دین تخریب کوي، د مسلمانانو په ځانګړي ډول د ځوان قشر په اذهانو کې د خپل دین او مذهب په اړه شکوک پیدا کوي.
د مسجد ملا امام یا نورو مولایانو ته څوک غوږ نه نیسي. هر سړی په خپل کور، دکان، دفتر یا شرکت کې نېټ کاروي.
نو مونږ باید د خپلې عقیدې او مفکورې خپرولو لپاره سوشل میډیا ته لاس رسی ولرو، له دې لارې د خپل دین او مذهب دفاع وکړو او ځوان قشر مو له ګمراهۍ وژغورو.
او پاتې شوه دا خبره چې په نېټ کې فساد، فتنه، ځان ښودنه کیږي او یا تصویر پکې خپرول کیږي؛ دا د هر انسان وجیبه ده چې ځان ترې وساتي. او بله دا چې(الضروریات تبیح المحظورات) ضرورت ځینې ممنوع شیونه هم مباح کوي. که موږ د سوشل میګیا له لارې د خپل دین او مذهب په خاطر خبله مبارزه پر مخ یو نسو؛ نو ناپوه مسلمانان په ځانګړي ډول ځوانه طبقه مو له تباهۍ سره مخ کیږي چې، دا یوی لور ضرر دی، باید دفع یې وشي.
له دې تمهیدي خبرو څخه زما موخه دا ده چې په رسنیو کې هر ډول خس او خشاک مبارزه کوي، د اصلاح په نوم خپلې فاسدې مفکورې په خلکو تمویلوي. او غواړي چې ساده مسلمانان په تېره بیا د ځوان کهول(نارینه او ښځینه) اذهان په څه چل او فریب په خپله ولکه کې راولي او بیا پرې خپله فاسده نظریه او عقیده مسلطه کړي.
دغه دعوتګر یو څو مشخص موضوعات لري.
لکه د اسلامي نظام نفاذ په اوسنۍ زمانه کې ناشوني ګڼل.
جمهوریت او دیموکراسي حاکمول.
کوټ، پتلون اغوستل.
یوازې د قرآن کریم تفسیر او څو احادیث یادولو باندې کفایت کول او بیا پر دین پوه علماء کرام ګواښل او هغوی ته د ناپوهۍ او ناحقې وینا کولو خطاب کول.
په دین نېوکې کول او ډول، ډول شبهات پکې پیدا کول.
ځوان قشر په ازاد فکر روزل.
د مېرمنې لپاره د کور څخه د باندې وظیفه کول.
د مېرمنو مخلوط تعلیم.
د مېرمنو د مخ پرده شرعي حجاب نه ګڼل.
او دېته ورته نور موضوعات لري. دوی د دغو موضوعاتو په ضمن کې خپلو فاسدو مفکورو ته کار کوي! خپل شوم اهداف او موخې پر خلکو په نوې طریقې سره مني.
نو ما په دې ټولو موضوعاتو کې د حجاب موضوع انتخاب کړه.
په راروانو برخو کې به پر لاندې ذکر شوو موضوعاتو رڼا واچوو. ان شاء الله!
– د مېرمنې د مخ پرده د قرآن کریم په رڼا کې.
د مېرمنې د مخ پرده د احادیثو په رڼا کې.
د مېرمنې د مخ پرده د امامانو او علماء کرامو له نظره.
– د مخ پردې په اړه شبهات او ځوابونه یې.
نو اړینه مې وبلله چې په دې موضوعاتو یو څه راجمع کړم د لیدونکو حضور ته یې وړاندې کړم. ومن الله التوفیق
نور بیا…
