خوست استخباراتو د ملي امنیت د پخواني غړي پټ ښخ شوی جسد په يوه کور کې وموند

کابل ټکی کام (دوشنبه، ۶ سلواغه، ۱۴۰۴ل)

د خوست ولایت مطبوعاتي دفتر ویلي چې د دغه ولایت د استخباراتو ریاست منسوبینو د هغه کس جسد موندلی چې شاوخوا اته میاشتې وړاندې په مرموز ډول وژل شوی و.

د معلوماتو له مخې، یاد کس د پخواني حکومت پر مهال د ملي امنیت د واکنش قطعې غړی و.

چارواکي وايي، نوموړی د خپلو ماماګانو او تره زامنو له لوري وژل شوی او جسد یې په خپل کور کې په پټه توګه خښ کړل شوی و.

ياد دفتر ويلي، چې د سیمې د خلکو او د عامې روغتیا ریاست د صحي ټیمونو په حضور کې يې جسد له خاورو راوویستل شو او وروسته کورنۍ ته وسپارل شو.

د یادې پېښې په تړاو درې کسان نیول شوي دي. مسوولین زیاتوي چې له لومړنیو څېړنو وروسته به نیول شوي کسان عدلي او قضايي ارګانونو ته وسپارل شي.