کابل ټکی کام (شنبه، ۱۱ سلواغه، ۱۴۰۴ل)
د ارشاد، حج او اوقافو وزیر شیخ نور محمد ثاقب وایي، سعودي عربستان د روان کال لپاره افغانستان ته د ۳۰ زره حاجیانو د حج سهمیه ورکړې ده.
د هغه په خبره، د افغان لوري د هڅو په پایله کې د سعودي حکومت له خوا په راتلونکو کلونو کې د یادې سهمیې د زیاتولو ژمنه هم ترلاسه شوې ده.
وزیر زیاته کړې، سږ کال د هر حاجي ټول لګښت ۲۶۶ زره او ۴۰۰ افغانۍ ټاکل شوی، چې د تېر کال په پرتله د هر حاجي پر لګښتونو کې ۱۵ زره او ۶۹۰ افغانۍ کموالی ښيي. د ده په وینا، د لګښتونو د کمېدو موخه د خلکو لپاره د حج اسانتیاوې برابرول دي.
د چارواکو د معلوماتو له مخې، د سږ کال د حج پروسې ټولیز لګښت شاوخوا ۷ میلیارده، ۸۱۸ میلیونه، ۳۰۷ زره او ۲۰۰ افغانۍ اټکل شوی دی. د حج وزارت مسوولین وایي، چمتووالی روان دی څو افغان حاجیان وکولای شي د غوره تنظیم او خدماتو تر سیوري لاندې خپلې دیني فریضې ترسره کړي.
