افشا شوي اسناد: معمر قذافي د جېفري اپسټین سره لیدنه رد او نوموړي ته د نیولو ګواښ کړی و
کابل ټکی کام (دوشنبه، ۱۴، سلواغه، ۱۴۰۴ ل)
د تازه افشا شویو اسنادو له مخې، بدنام امریکايي پانګوال د سفر پر مهال هڅه کړې وه چې د لیبیا له پخواني مشر سره وویني، خو دغه وړاندیز د قذافي له لوري په کلکه رد شوی و.
راپورونه ښيي، چې اپسټین لومړی د رسمي لیدنې غوښتنه کړې وه، خو څو ساعته وروسته قذافي دا غوښتنه رد کړه. وروسته، اپسټین د میلیاردونو ډالرو د پانګونې او مالي شریکۍ په نوم بله هڅه هم وکړه، خو د لیبیا پخواني مشر پر دې وړاندیز هم منفي ځواب ورکړ.
د اسنادو له مخې، قذافي نه یوازې له دې وړاندیزونو ډډه وکړه، بلکې اپسټین ته یې د قانوني اقدام او نیولو ګواښ هم کړی و. سرچینې وایي، هغه د اپسټین له مشکوکو اړیکو، چلونو او تېر سابقې څخه خبر و او نه یې غوښتل له نوموړي سره هر ډول اړیکه ولري.
افشا شوي فایلونه څرګندوي، چې القذافي هڅه کړې وه خپل سیاسي او شخصي اعتبار له داسې اړیکو څخه وساتي، چې د جنسي فساد او غیرقانوني کړنو له تورونو سره تړاو لري.
شنونکي وایي، دا اسناد یو ځل بیا ښيي چې د نړۍ په کچه ځینې ځواکمن او بانفوذه کسان د اپسټین له شبکې سره تړلي وو، خو ځینو نورو بیا له پیل څخه له دغو اړیکو ځان لرې ساتلی و.
کارپوهان زیاتوي، چې دا افشاګري د شفافیت، اخلاقي مسؤلیت او قانوني حسابورکولو پر اهمیت ټینګار کوي او دا پیغام ورکوي چې حقیقت، که هر څومره ناوخته هم وي، بالاخره څرګندېږي.
