کابل ټکی کام (سه شنبه، ۱۲ کب، ۱۴۰۴ل)
د ملګرو ملتونو سازمان ویلي، چې د فبرورۍ له ۲۶مې تر مارچ لومړۍ نېټې پورې د پاکستان د پوځي بریدونو په نتیجه کې په افغانستان کې لږ تر لږه ۳۴ ملکي وګړي شهیدان شوي او ۸۹ نور ټپیان شوي دي.
د ملګرو ملتونو د سرمنشي ویاند سټیفن دوچاريک په وینا، په وژل شوو او ټپیانو کې ښځې او ماشومان هم شامل دي.
وياند زياته کړې، یادې شمېرې لومړنۍ دي او د افغانستان په مختلفو سیمو کې د ملکي تلفاتو د ثبتولو او مستندسازۍ بهیر لا هم روان دی.
همداراز د ملګرو ملتونو مرستندویه پلاوی (یوناما) د دې هڅو په ترڅ کې هڅه کوي، چې د پیښو جزییات په دقیق ډول راټول او مستند کړي، ترڅو د بشري حقونو او نړیوالو قوانینو له مخې د حساب ورکولو زمینه برابره شي.
خو د افغانستان د بېلابېلو بنسټونو د شمېرو له مخې، تر اوسه د پاکستان پوځي رژيم په وحشيانه بمباريو او بريدونو کې ۸۲ ملکي وګړي شهیدان او ۱۲۳ نور ټپیان شوي دي.
