کابل ټکی کام (یکشنبه، ۲ وری، ۱۴۰۵ل)
د حماس اسلامي غورځنګ د پوځي څانګې ویاند “ابو عبیده” د ایران له لوري پر اسرائیلو د تېرې شپې ترسره شویو توغندیزو بریدونو ته په غبرګون کې ویلي، چې دوی دغه بریدونه په ډېر ویاړ سره ارزوي او دا یې د دښمن پر وړاندې یو پیاوړی اقدام بللی دی.
نوموړي ویلي، د ایران توغندیز بریدونه نه یوازې د ایران پر وړاندې د صهیونیستي-امریکایي تېري ځواب دی، بلکې په غزه کې د فلسطیني ولس پر وړاندې د روانې وژنې طبیعي غبرګون هم دی.
ابو عبیده زیاته کړې، چې “دښمن یوازې د زور ژبه درک کوي” او که پر هغوی درانه لګښتونه ونه تپل شي، نو خپل بریدونه به لا پسې زیات کړي.
ابوعبیده د ایران اسلامي جمهوریت د اسلامي امت لپاره د مخکښې دفاعي کرښې په توګه یاد کړی او ویلي یې دي، چې یرغلګر به هېڅکله ونه توانېږي د آزادو خلکو اراده ماته کړي.
د حماس ویاند همداراز د اسلامي نړۍ له ټولو ولسونو غوښتي، چې د خپل “اصلي دښمن” پر وړاندې سره یو موټی شي او د ګډو ارزښتونو لپاره، په ځانګړې توګه د فلسطین د ازادۍ لپاره، ګډه مبارزه وکړي.
