کابل ټکی کام (چهارشنبه، ۱۹ وری، ۱۴۰۵ل)
امريکايي ليکوال او تاریخ پوه آرون آستور ویلي چې ښکاري ولسمشر ټرمپ غوښتل د منځني ختیځ د جګړې د اوربند اقدام وکړي، خو نه يې غوښتل داسې ښکاره شي چې پخپله یې پیل کړی. د هغه په وینا، ټرمپ د پاکستان د لومړي وزیر لپاره یوه مسوده چمتو کړې وه چې خپره شي، خو چا ناڅاپه د متن سر کې لیکل شوی “Draft – Pakistan’s PM Message on X” پرېښود، او وروسته شهباز شریف دا برخه ژر حذف کړه.
پیغام کې د پاکستان لومړي وزیر شهباز شریف غوښتنه کړې وه چې د خبرو لپاره وخت دوه اونۍ وغځول شي، د هرمز تنګی پرانیستل شي او ټول جګړه کوونکي اړخونه دوه اوونۍ اوربند اعلان کړي.
آرون آستور او څېړونکي دې کار ته په کتو څرګنده کړې چې د لومړي وزیر اقدام ډېر ضعیف او کمزوری ښکاري، ځکه داسې ښکاري چې د پاکستان رسمي څرګندونې د امریکا د سپینې ماڼۍ په لارښوونه جوړې شوي او د خپلواکۍ بڼه نه لري.
د آستور په وینا، دا پېښه ښيي چې د پاکستان لومړي وزیر د اوربند د هڅو د اعلان پر مهال خپلواکه دریځ نه دی نیولی، او د دې کار له امله د پاکستان د دیپلوماتیک اعتبار اغېز لیدل کېږي. همدارنګه، پیغام ښيي چې د خبرو د مخکښ جریان پر ځای یوازې د نورو لارښوونو تعقیب شوی دی، چې د اوربند هڅه یې کمزورې او نیمګړې کړې ده.
آرون آستور د ۱۹ پېړۍ د امریکا د تاریخ یو پېژندل شوی تاریخ پوه دی. هغه په Maryville College کې د تاریخ د څانګې همکار استاد دی او د امریکا د کورنۍ جګړې او د هغه وخت د ټولنیزو او سیاسي بدلونونو په اړه څېړنې کوي.
