کابل ټکی کام (چهارشنبه، ۲ غویی، ۱۴۰۵ل)
د ایران د اسلامي انقلاب ساتونکي ځواک “سپاه پاسداران” اعلان کړی، چې نن چهارشنبه یې د هرمز تنګی په ستراتیژیکه سیمه کې دوه سوداګریزې کښتۍ نیولي او د ایران ساحلونو ته یې انتقال کړې دي.
د سپاه له لوري په خپره شوې اعلامیه کې ویل شوي، دغه عملیات د سمندري قوانینو د پلي کېدو او د سیمې د امنیت د ټینګښت په موخه ترسره شوي دي. خو تر دې دمه د نیول شویو کښتیو د هویت او د هغوی د عملې په اړه نور جزییات نه دي شریک شوي.
راپورونه وایي، چې هرمز تنګی د نړۍ له مهمو اوبو لارو څخه شمېرل کېږي، په وروستیو کې د امنیتي پېښو شاهد پاتې شوی او هر ډول تحول پکې د نړیوالو بازارونو، په ځانګړي ډول د انرژۍ پر بیو مستقیم اغېز لرلی شي.
تر اوسه د دې پېښې په اړه د نورو هېوادونو رسمي غبرګون نه دی څرګند شوی.
