مهاجرينو کمېسیون: تېره ورځ ۱۰۶۶ کډوالې کورنۍ هېواد ته راستنې او اړینې مرستې ورسره وشوې
کابل ټکی کام (شنبه، ۲۶ غویی، ۱۴۰۵ل)
د مهاجرینو ستونزو ته د رسېدنې عالي کمېسیون ویلي، چې د جمعې په ورځ د هېواد د بېلابېلو لارو له لارې ۱۰۶۶ افغان کډوالې کورنۍ هېواد ته راستنې شوې دي.
د راپور له مخې، دغه کورنۍ د تورخم، سپین بولدک، ورېښمو لارې او اسلام کلا له لارو هېواد ته داخلې شوې او ټولټال ۵۶۵۶ کسان ثبت او بایومټریک شوي دي.
د کمېسیون په وینا، له راستنېدونکو څخه ۱۰۳۱ کورنۍ خپلو اړوندو ولایتونو ته په خوندي ډول لېږدول شوې دي. همدارنګه له ۸۹۰ کورنیو سره نغدي مرستې شوې او د لېږد رالېږد لپاره میلیونونه افغانۍ کرایه هم ورکړل شوې ده.
راپور زیاتوي، چې راستنېدونکو کډوالو ته روغتیايي خدمات، خوراکي توکي، عامه پوهاوی او ۹۷۹ وړیا سیمکارتونه هم وېشل شوي دي.
